近期濠江賭業股降溫，好多股份如英皇中國（296）、澳門實德（487）等都出現獲利回吐，監管機構亦大聲疾呼叫投資者帶眼識人，但仍有唔少公司趕搭尾班車，加入濠江概念呢個遊戲。
例如噚日急升37.98％的華多利（1139），江湖傳聞有新幕後炒家加入，炒作藉口同一般濠江概念股一樣。華多利昨日收0.109元，成交股數7344.7萬股，金額669萬元。
此外，原先小初以為搞開肝藥的生命科技（1180），話洽商收購賭場現場直播電子百家樂遊戲系統獨家經營牌照只係講吓笑，點知噚日經紀陳話濠江有位猛人最細嗰位兄弟，同埋另一位濠江猛人合組公司在市場買入生命科技成5％股份，平均購入價低於0.12元。
小初心諗，佢哋無情情買咁大手貨，莫非真係想同生命科技合作進軍濠江賭業？
不過，生命科技股價噚日就冇咩特別，跌1.74％，收0.113元，成交股1352.6萬股，金額150.87萬元。
慕容小初