洪金寶、任達華、袁彩雲、前奧運體操金牌選手李寧、李小雙等噚日去咗粉嶺出席歐米茄高爾夫球賽。洪金寶着住對DIY嘅涼鞋出席，非常搞笑，原來佢右腳底生瘤，啱啱做完手術。
洪金寶話：「我兩隻腳都有生瘤，生咗年幾，不過近排右腳痛到行唔到，十日前咪去做手術割咗佢，成粒雞子咁大粒。」問佢可需做化療？洪金寶話：「唔使，係良性瘤，醫生話係角質問題喎，我隻手都生咗啲良性脂肪瘤，可能遺傳啦，醫生重叫我減肥㖭！」
講到香港電影慘淡，聖誕只有同佢不和嘅周星馳套新片《功夫》上映，洪金寶就唔肯講話會唔會捧場，問佢點睇星仔優待日本傳媒，佢則回應話：「我唔評論呢個人。」問佢係咪對星仔為人太了解，洪金寶就點頭示意。不過之後記者問多兩句，佢竟然話：「夠喇，今日我哋講番Human（人類），唔係Human嘅嘢唔好講喇。」
而任達華就話佢上星期喺內地剪綵，俾啲熱情巿民撞親，搞到佢尾龍骨第四、五節移位，佢重話𠵱家唔瞓得軟床，搞到要瞓地下㖭！ 採訪、攝影：梁錦雯
葉璇噚日去將軍澳電視廣播城拍攝無綫賀年卡，佢話今年聖誕節決定同好友李詩韻返家鄉上海度過，並會盡地主之誼帶好友品嘗大閘蟹。
問佢哋會否結伴找對象共度佳節，葉璇就話：「唔需要，我哋女仔嚟，要有矜持。」
樂壇新人鄧穎芝今日會推出首張個人唱片，今年一眾新人當中，佢算係最遲出碟，鄧穎芝話：「其實張碟重有唔滿意嘅地方，但係張碟要趕住出，希望下張唱片做好啲，人哋會覺得我有進步，今次賣到一千張已經好開心。」馮仁昭就覺得如果佢首張大碟只係賣得一千張，睇怕佢要落多啲功夫練歌啦！
陳浩民噚日喺台灣推出首張國語專輯《愛海滔滔》，原本話要出席撐場嘅緋聞女友佘詩曼就唔見人，陳浩民唔單止冇唔開心，反而重好似鬆咗口氣咁，佢用國語講話：「好彩她沒來，不然我反而更緊張！」噚日有好多女仔送花畀陳浩民，問佢佘詩曼會唔會呷醋，佢就話佘詩曼都唔知。
劉嘉玲早排接受台灣電視台訪問，提到做香港電視購物頻道嘅行政總裁，嘉玲話自己係一個認真嘅主管，向來自己都好鍾意買嘢，但以前佢由蘇州嚟香港嗰陣，就好唔識打扮，畀人感覺好俗，又成日喺片場俾導演鬧，搞到心理不平衡！不過嘉玲就覺得就係因為呢啲磨練，先至有今日嘅成就。
EliteModelLook2004世界精英模特兒大賽國際總決賽將會喺今晚舉行，擔任評審嘅碧咸太太Victoria（前），噚晚七點幾已經到咗上海，佢將會同內地導演陳凱歌等，喺八十位參加者之中，選出頭十五位，而今次代表香港嘅模特兒，就係MelanieWooZeller。
