阿仙奴副主席甸恩日前喺一個會議上話，𠵱家啲英超聯直播波實在太多，直頭去到飽和程度，長遠嚟講對足球唔係一件好事；但對於球迷嚟講，特別係有買波嗰批，只會嫌直播得少，唔會嫌直播得多。
甸恩禮拜二喺一個喺杜拜舉行嘅足球會議上話，記得佢喺八二年啱啱嚟阿仙奴時，佢哋全季得六場直播波，但到咗今日，就幾乎個個禮拜喺電視直播上出現，所以佢擔心球迷會睇到厭，佢話：「或者英超聯啲直播波經已飽和。有陣時，係貴精不貴多。」不過我求大俠就唔太認同甸恩嘅講法。
𠵱家收費台每個禮拜最多直播七場英超聯比賽，對於有落注嘅球迷嚟講，呢啲直播波不知幾咁重要，事關佢哋除咗可以一邊買波，一邊睇波之外，重可以順便做功課，研究一吓點先至可以喺馬會身上贏錢；就算對冇賭波嗰班球迷嚟講，可以欣賞到啲水準咁高嘅比賽，真係無人會嫌多。
車路士領隊摩連奴不嬲口水多多，最近就撩㷫風馬牛不相及嘅意甲隊巴勒莫。事緣佢提到就領軍返波圖比賽時，無厘頭話如果去治安差嘅巴勒莫比賽都要用五個保鑣，但佢咁講自然引起不滿，巴勒莫教練古杜連就彈佢扮知識廣博，懶醒，摩連奴真係無端端樹敵囉！
上季對「車仔」幫紐卡素射入奠勝一球既舒利亞，最近一直受到傷患困擾，據「紐記」方面講，雖則呢位射手正努力操弗狀態，但希望唔大，趕唔切今個星期復出再對車路士，𠵱家愈來愈少英格蘭球員做大球會隊長，要睇泰利鬥舒利亞兩位英倫隊長大鬥法，要等次循環囉！
曼聯嘅菲臘尼維利有感效力球隊多年仍未獲重用，終萌離隊之意，嚟緊一月轉會期好可能步師兄畢特後塵，蟬過別枝。領隊費爵爺就話嚟緊聯賽盃同歐冠盃分組賽嘅「例行公事」，會畀佢打正選，希望盡力留人。係人都知呢啲波無關痛癢，咁就叫「重用」？費Sir真係搞笑。
達拉斯小馬嘅老闆古賓噚日宣布將會成立一個對沖基金，不過唔係用嚟炒股票或債券，而係專門用嚟賭博體育運動，佢重話會搵最好嘅職業賭波高手幫佢搵錢。古賓過去十五年來，喺股票市場賺到盤滿缽滿，認真厲害，你估佢今次能唔能夠贏埋拉斯維加斯班大莊家呢？