梁朝偉、舒淇和任賢齊現正於韓國拍攝電影《韓城攻略》，偉仔演港版００７，與小齊須應付不少打鬥吊威吔等高難度動作，舒淇則扮演女飛賊，與偉仔和小齊陷入一段錯綜複雜的三角關係。小齊更大讚舒淇漂亮又捱得。
寰亞電影公司賀歲片《韓城攻略》仍在韓國拍攝中，導演馬楚成、演員梁朝偉、任賢齊和舒淇在戲中要應付不少難度高的動作場面，而偉仔與小齊是主打人物，經常要吊威吔飛來飛去。
不過偉仔全然不覺得辛苦，他說：「拍戲當然辛苦，邊部戲都一樣，但能拍到一部自己喜歡嘅，連辛苦都唔記得啦！」
偉仔所飾演的林仁貴，可說是港版００７，偉仔亦非常喜歡此角色，他說：「唔理喺東京、漢城，定係將來去印度或倫敦，我都希望繼續延續呢個角色，咁樣部戲就唔止得兩部，其實除攻略系列外，我最遺憾係未拍過驚慄片，唔知點解冇人搵我拍呢類片種。」
小齊與舒淇今次亦合作得相當有默契，小齊眼中的舒淇不但漂亮，而且拍戲認真和捱得苦，在片中飾演飛賊的舒淇則大讚小齊十分敬業，無論難度多高的動作，他都會認真去學習，見他吊威吔時，身上、手上滿是傷痕，絲毫沒有埋怨，還常掛着笑容，跟大家聊天，可見小齊很專業。
此外，中西賀歲片只有四至五部，導演馬楚成對《韓》片很有信心，他說：「市場上有激烈競爭係在所難免，但係愈競爭就愈能展示實力，我知道其他影片大部份都係以情感為主，呢種情況下，《韓城攻略》嘅動作加輕鬆就變得另類。」
