貴為Chanel、Fendi及LagerfeldGallery3大高級時裝品牌設計舵手，KarlLagerfeld特地為HighStreet品牌H&M設計平價系列，結果數小時賣清，上晒報紙外電版都咪話唔威，但係KaiserKarl之後就好勞嘈，接受德國雜誌《Stern》訪問時大罵同H&M無下次。佢話原意係想令負擔唔起高級時裝嘅人，都可以擁有佢嘅個人系列，但係H&M管理層生產數量太少，令有人可轉手放上eBay大炒特炒，違背佢本意，兼且佢一心諗住個系列係畀纖瘦嘅人着，點知H&M喺佢唔知情下擅自將尺碼放寬，一啲都唔尊重創作者原先嘅意念，Lagerfeld當然「興上加興」！
H&M回應：16碼唔算肥！
對於指摘，H&M管理層隔咗成個禮拜先有回應，但就火藥味十足。H&M市場總監JorgenAnderson話收到好多英國顧客投訴，對於Lagerfeld嘅言論感到好「Upset」，佢肉緊地補充，話16碼是一般英國女士的尺碼，根本唔算肥，就算係肥，唔通就無權享受時裝嘅樂趣？佢認為Lagerfeld應該向顧客道歉。理直氣壯得緊要，之但係就炮轟佢哋生產太少一事卻隻字不提。
呢邊廂KaiserKarl餘怒未消，那邊廂「EnfantTerrible」時裝壞孩子JeanPaulGaultier卻興致勃勃搞搞平價大師衫，Gaultier剛剛跟法國最大時裝郵購商LaRedoute達成合作協議，為佢哋明年春夏時裝目錄設計一個共有20款的小型系列，將會在基本衣服式樣中，加入他的招牌海軍條子圖案及Corset款式等等。Gaultier向yahoo.com透露，這個系列只會係一Take過，並唔會係常設系列，產量亦不會多，只係想做一些佢唔會放在自己品牌中的簡單衣物。
記者：吳小明