隔晚美股少少唔掂，日股跌百幾點，加埋創維（751）事件，絕大多數人估話今回凶多吉少。股市嘅嘢，就係唔畀絕大多數人估中，1隻新地（016）彈升2元，就帶動個市，成個長實（001）早前翻版。
有新地C輪在手者，坐定定，咪兩頭擰，過早出貨好易益下家。
滙控C輪：昨日一路trade緊之時，人心唔多定，但滙控（005）任何時間都有幾球擺喺度買，當然沽盤亦唔輕。埋單價133.50元，升1格。
滙控現價較年頭升11%，但喺英國，滙控900便士以下，英鎊計同1年前比較只係升咗唔夠2%，皆因英鎊上升。所以唔怕有英國嗰便嘅獲利回吐。滙控炒年底例旺，買定C輪，到人人唱「聖誕鐘、買滙豐」嗰陣，應該有非常豐富嘅聖誕禮物。唔使多心，揀4441，明年6月尾到期，輪價96仙，負溢價0.02%，槓桿率13.9倍。負溢價，唔使理有效槓桿率同引伸波幅（數據其實好吸引）。唔使畀溢價（但冇股息收），用14分之1嘅本金賭7個月，抵到爛。4445交投更旺，輪價85仙，溢價0.7%，槓桿率15.7倍，壽命短成個月，相比之下，4441靚過佢。
中銀C輪：中銀（2388）收14.65元，升1格。滙控好，中銀唔會唔好。
搵中銀C輪炒，冇乜可以選擇，先幾日推介過9169，就係呢隻，明年2月到期，溢價1.0%，槓桿率6.1倍（有效5.4倍），引伸波幅30.4%。當然，假如中銀與滙控正股波幅相同則9169嘅爆炸力，及唔上4441嘅一半。
章盛