【本報訊】一代鬼才黃霑病逝，他的喪禮已於昨日低調地舉行。由於其家人事前保密功夫做足，以致他生前有不少好友對黃霑已出殯，連遺體亦火化了，無不感到愕然和驚訝。連他的多年合作夥伴兼好朋友顧嘉煇事前一樣是懵然不知，難怪顧嘉煇接受訪問時，亦坦言有些失望。 記者：陳月媚
身在加拿大的顧嘉煇，昨日接受記者長途電話訪問，他說：「我都係剛剛收到黃霑出咗殯嘅消息，事前佢屋企人都冇講我聽，所以我一直以為四號返嚟係出席喪禮，當我知道佢出咗殯嘅消息，真係幾突然，我唔敢批評佢屋企人，但作為佢嘅好朋友，當然係想幫佢風光大葬，因為香港咁多人想紀念呢位樂壇鬼才，所以呢個安排，我係有啲失望。不過點都好啦。五號嘅追思會我一定會返嚟香港出席，作為向呢位故友作最後敬意。」
黃霑另一位好朋友，國際影星周潤發昨日知道此消息後，同樣感到驚訝，他說：「吓？出咗殯嘞？點解會冇人知嘅？我以為佢七號先出殯，重諗住到時會去靈堂鞠躬，真係諗唔到會突然間連殯都出埋，如果呢個係霑叔本人嘅生前意願，而佢屋企人又認為咁搞係最好，咁我哋當然要尊重番佢哋家人嘅決定。大家覺得奇，可能因為中國人嘅觀念，始終希望隆重喪禮啦！」不過下周日（五日）在大球場的黃霑追思會，周潤發考慮了現場的環境後，他決定不出席，改而在家向故友進行追思。
導演高志森曾與黃霑合作拍過多部電影，又有份協助辦理黃霑喪事，昨日他表示：「之前我已經知道呢個安排，其實由霑叔患病到離開，佢同屋企人都係好低調，既然佢家人想低調，大家應該尊重佢哋嘅決定，如果霑叔個喪禮只係想至親嘅家人先可以參與，對呢個安排，我係完全可以理解。」下周日的追思會，高志森表示自己必定會出席。
曾主唱黃霑作品的葉麗儀昨晚表示對黃霑低調火化不感意外，她說：「我覺得係意料中事，都知佢會咁做，佢病嗰時都係由頭到尾都咁低調啦。我同佢、Winnie曾經係鄰居，我遲啲會去北京，但一定會趕返香港出席追思會。」
鄺美雲日前請星雲大師寫四字「上生佛國」橫扁給黃霑，黃霑昨日低調舉行喪禮，問她橫扁如何處置，鄺美雲昨日說：「星雲大師已經寫好，我約咗蕭潮順今晚攞畀佢，無論佢哋安排點用都好，隨霑叔家人處置啦。」至於沒機會送別霑叔，鄺美雲說：「我覺得最緊要係睇霑叔本人同佢家人嘅意願，照番佢哋嘅選擇啦，朋友送唔到佢當然可惜啦。」
鍾鎮濤曾被黃霑點名是溫拿中他最疼錫的一個，阿B昨日說：「我當然想送佢一程，但既然霑叔想低調，應該尊重佢意願，佢大半生人都喺娛樂圈中，要面對咁多人，佢想走嘅時低調就應該照佢意思，𠵱家五號都搞追思會，到時我會去，有心送佢嘅出席追思會都一樣表達到心意。」
另外，劉培基接受內地報章訪問，談及黃霑喪禮採取了如此低調的形式，是因為黃霑的太太不希望受到外界打擾，只想兩個人安安靜靜地在一起。
