容祖兒昨日在中環示範鑽飾，更即場接收價值超過十五萬元的鑽石首飾。祖兒更講到出口，希望老闆贊助她戴鑽飾，令她在年尾頒獎禮上閃令令。
容祖兒昨日在中環為英皇鐘錶珠寶示範其新系列的珠寶鑽飾，楊受成與其母親陳銀女、女兒楊諾思、伍詠薇和黃佩霞等都有出席。
祖兒以嘉賓模特兒身份，穿上YSK新裝，示範一套四件的18k白金鑽飾，包括戒指、耳環、手鈪及心口針，總值超過十五萬元。
祖兒完騷後開心地表示獲大會送上整套珠寶作酬勞，她謂此次乃第二次行珠寶騷，第一次則是在台灣示範首飾。
祖兒透露平日喜歡戴耳環，因為她唱歌時鏡頭通常拍攝其大頭特寫，她說：「今日幫公司集團做嘢，戴住十幾萬喺身，都有少少緊張。公司𠵱家送晒畀我，真係好開心，最希望喺年底頒獎禮公司會贊助我戴鑽石，等我出嚟『行』啲，又可以慳番唔少錢。」
講到鑽石經，祖兒謂她首次收到男友送鑽石，是初戀時收到十七歲男友送贈的碎鑽戒指，她說：「隻戒指係佢打工儲錢買㗎，不過後來我屋企火燭，消防員救火時，射咗好多水入屋，隻戒指俾水沖走咗。」
祖兒獨得英皇垂青，問她老闆楊受成可有送過珠寶給她作禮物？她說：「好少，楊生多數都係送手表，有時重送啲特別版，試過收最貴成幾萬蚊。不過我戴首飾、手表都好粗魯，所以唔捨得戴。」
採訪：顏英儀
攝影：林德雄
