二○○四美國Billboard音樂頒獎禮將會喺下星期一喺賭城拉斯維加斯舉行，今年憑大碟《Confessions》攞獎攞到手軟嘅R&B歌手Usher，今次囊括咗十三項提名，而Usher個好拍檔AliciaKeys亦都攞到十二項提名，真係成個頒獎禮俾佢哋玩晒。
今次Usher同Alicia嘅提名成為男女藝人之冠，佢哋除咗係全年「最佳男、女藝人」嘅大熱門外，重會喺八項提名入面正面交鋒，當中包括「全年最佳藝人」、「Hot100全年藝人」、「Hot100全年單曲」以及R&B?HipHop項目中嘅「全年最佳大碟」、「全年最佳單曲」、「全年最佳大碟藝人」、「全年最佳單曲藝人」同「全年最佳藝人」。講到爭獎，真係幾老友都冇情講。
至於搖滾組合Maroon5就得到八個提名，而HipHop組合OutKast亦有四個，絕對唔可以睇小佢哋。至於去年威盡Billboard頒獎禮嘅BeyonceKnowles，今年成績就差啲，因為佢同男友Jay-Z只係分別得到二個同一個提名。由於今次頒獎禮嘅結果係由各藝人喺Billboard流行榜上面嘅成績而釐定，所以今年唱片大賣嘅Usher明顯被睇高一線。