大市噚日要跌嘅話，真係大把理由。一來美國同日本股市都唔生性，二來創維（751）事件又再次打擊投資者信心（今次連基金同大行都「孭鑊」），三來盈大地產（432）配售反應又唔好，重跌破配售價；咁多不利消息集埋一齊，大市反應就出乎大多數人意料之外，早段急跌理所當然，但下晝就由低位大幅抽番上，結果低開高收，重大升過百點。
恒指噚日曾跌穿14000大關，低報13936，跌123點，午後掃上高收，期指亦轉為高水。大戶再度舞動兩大藍籌──滙控（005）同中移動（941），而長實（001）同和黃（013）又繼續有好表現，加上落後的新地（016）亦加入大升行列，短期內，大市升勢仍由大藍籌主導。
睇大戶動向，既然郁得中移動同滙控，後市大升，都應該幾有把握；14200會有阻力，但衝破的機會甚大，下一個目標，將係14500至15000。
國企股暫時未有勢，國指噚日更下跌24點，不過，原料股仍係可候低吸納。噚日最靚嘅又係吉林化工（368），高收2.70元，升2.8%，總之一衝破2.75元阻力，就要追進，以量度升幅計，目標指向3.20元。家吓上車，有近20%的上升空間，博得過。
銀建（171）噚日玩大插插，一度質到落4.175元，大跌近7%，好在下晝上番去，收4.375元，跌2.2%，走勢則形成一個錘頭，起碼係一個利好嘅訊號，證明早段有沽壓，但在低位亦有大盤低吸，沽盤唔少係因為要計數，但買盤則應該有信心後市會上升，若然今日銀建再出現一支大陽燭，或者一兩日內上番4.55元至4.60元水平，則可確認晨光之星，短期調整完成，升勢再現，上升目標指向5.50元至6元。
前日，中國東方資產管理話，在信達手中收購咗原建設銀行剝離的不良貸款，成1300億元人民幣，市場就有唔少人懷疑銀建作為信達旗艦嘅角色是否有變，銀建股價下跌，呢個亦可能係原因之一。不過，聽北京消息，話呢個係官方內部安排，由財政部指令中國東方接手而已。事實上，全中國嘅不良資產多到計唔掂，銀建肯定食唔晒，聽聞呢一輪鋪排中嘅大動作，正在密鑼緊鼓進行中，好快就會有好消息。
郭兆誠