森美和小儀上周和五十名fans共度生日，fans用朱古力豆、餅乾、菠蘿和忌廉等製成蛋糕送給兩位壽星仔女，但兩人卻嫌fans的製成品肉酸而不肯進食。
森美、小儀這對好拍檔的生日只相差十天，森美明天生日，小儀則在上月二十三日，所以兩人在上周末於尖沙嘴與五十名fans共慶生辰，森美透露今年收到一份相當特別的生日禮物，他笑說：「我前幾日收到一個螞蟻蛋糕，因為個fans喺電台門口等我時，將個蛋糕放喺地下，所以一打開就見到有好多蟻喺度爬吓爬吓，但點都係佢一份心意，我都收咗呢個螞蟻蛋糕。」而小儀就藉此呼籲fans，希望能收到一些小狗用品作為生日禮物。
森美小儀表示和fans搞聚會已有三年，為了讓大家有多些機會參與公益活動，所以有時會一起探訪老人院和兒童院，森美說：「佢哋大部份讀緊書，有啲做緊嘢，我都好感激佢哋肯抽時間陪我哋做公益活動。」
當日現場fans用朱古力豆、餅乾、菠蘿和忌廉等製成蛋糕送給兩位壽星仔女，但他們因為嫌製成品賣相欠佳而不願進食，還不肯評分。小儀說：「啲fans平時好細心，會買定啲零食畀我哋，有時聽節目知我哋有感冒，會買開聲茶畀我哋飲。」
問到二人的生日願望，森美表示希望明年可以奪取獎項，他說：「我個人好虛榮㗎，總之我唔理乜嘢獎啦，如果真係冇就仙人掌都殺。講真一句，就係希望喺電影工作方面有好成績，拍多幾套好嘅電影。」而小儀希望工作順利及身體健康。
採訪、攝影：李珮洳
