貿發局前行政總裁施祖祥退休咗半年，日本政府早前宣布，日皇欽定要頒一個「旭日中綬章」畀佢，以表彰佢對加強日港經濟及貿易關係嘅貢獻。
授勳典禮噚日喺日本駐港總領事嘅山頂府邸盛大進行，由總領事北村隆則負責頒授，北村話識咗施公好耐，今年四月重返香江，知道施祖祥退休在即，覺得有需要確認佢嘅貢獻，所以向自己政府大力推薦，結果獲得接納。
獲得大日本嘉許，施公當然喜出望外，佢話當年特首頒個金紫荊星獎畀佢，佢已經覺得好圓滿。施公又話，佢同日本淵源好深，第一次出埠就係以學生代表身份去日本開會，今次退休之後，又從上海坐船去日本旅行，之後先至去歐美，第一次無牽無掛去玩。施公睇嚟唔止係肥彭死黨，重係大和民族嘅好朋友。除咗施公家人之外，佢嘅舊部都有嚟觀禮，包括林天福、俞宗怡同黎高穎怡等。
（圖）施公（中）獲勳，施太莫美嫻（前排右）當然高興。後排係施太家人（後排右起）施太妹妹莫麗嫻，施太叔婆莫老太以及施太阿媽。總領事北村隆則坐喺施公旁邊。
傳真︰2623-9278
電郵︰