基金愛股之一創維數碼（751），噚日原本公布中期業績，小初預期可借靚靚業績炒番轉，點知搞出單廉記拉人事件，重話涉及上市時造假帳，聽到呢單大鑊嘢，唔單止小初嚇一驚，好多芬佬都措手不及。
經紀黃話，唔少芬佬都揸重創維，今次睇嚟有排停牌，想沽貨走人都唔得，分分鐘拋售其他民企股洩憤都未定，睇嚟暫時都係避開民企股比較穩陣。
小初十分唔明，創維上市咁多年，點解到𠵱家先至查到嘢，重有，好多芬佬同分析員都勁讚創維，咁都出事，實在令人錯愕。
另外，即將改名泰德陽光的陽光體育媒體（307），前日停牌話搞配股，但小初四圍問，都聽唔到邊間行幫手批股，想話要番多少都唔得。經紀陳話，傳聞陽光批股係畀指定parties，唔係向街外投資者伸手，所以就無消息出街。
據講今次配股價係1.8仙，比起停牌前收市2.4仙，折讓25％。
慕容小初