無綫《十大勁歌金曲頒獎典禮》雖然下月八日才舉行，但無綫董事利孝和夫人昨日與劉德華在一個公開場合碰面時，竟事先張揚會在《勁歌》頒獎禮上頒獎給對方，難免令人猜想頒獎禮賽果早已內定。華仔對此亦嚇了一跳，更請求傳媒手下留情，以免無綫在壓力下不頒獎給他。
劉德華昨日以「護眼之星」的身份，到港台出席「暖流行動——光明在望現彩虹」活動，現場有四位日前接受白內障手術的長者，由華仔和光明行動護眼基金主席林順潮教授即場為他們拆除眼上的紗布，其間竟有長者以為是華仔替他做手術，令華仔啼笑皆非。
而無綫董事利孝和夫人昨日則以籌款委員會主席身份到場，席間她與華仔談得十分投契之餘，更打趣地向華仔說：「遲啲喺《勁歌》見，到時我頒獎畀你啦！」利孝和夫人此語一出，即惹來諸般揣測，因為利孝和夫人每年在《勁歌》頒獎禮上定必負責頒發大獎，如本年初舉行的○三年度《勁歌》頒獎禮中，利孝和夫人分別負責頒發「四台聯頒音樂大獎」的「傳媒大獎」給Twins和容祖兒，及頒發「金曲金獎」給容祖兒，故她昨日言下之意，似在暗示《勁歌》當晚的「最受歡迎男歌星」獎是華仔囊中之物。
對於利孝和夫人事先張揚華仔攞獎一事，華仔說：「嚇死我，咁早知，費事俾你哋亂寫，一陣TVB唔頒畀我，唔好畀壓力TVB。可能臨近頒獎禮，好似講乜都有關係，大家唔好咁多揣測，乖啦！」
事後華仔又補充說：「其實利孝和夫人係話好似邊個活動都見到我，睇怕年尾大獎個個都係頒畀你㗎啦。」
不過當華仔得知李克勤最想奪得《勁歌》頒獎禮的「亞太區最受歡迎香港男歌星」獎時，他即自信地說：「即管放馬過嚟，不過都係唔好搞我啦。」
而無綫製作部高級經理陳家揚昨日則在電話中澄清利孝和夫人之言是一場誤會，他說：「點會咁快知道頒乜嘢獎呀？我哋係有邀請利孝和夫人頒獎，但到時佢頒乜嘢獎都未決定，我相信可能大家誤會咗佢意思啫。」據悉下月《勁歌》頒獎禮中，最受注目的「最受歡迎男、女歌星」獎，將是華仔和容祖兒的囊中物。
另一方面，華仔憑電影《無間道III終極無間》成為台灣金馬獎「最佳男主角」網上博彩大熱，華仔昨日開玩笑說：「妄想呀？如果係賭錢就唔好買我，賺咁少，自己買都會買冷，不過今年攞到就唔好話同情我，我真係做得幾好。但係我就估唔到《大事件》係『最佳影片』大熱。」
此外，Beyond日前批評李克勤、許志安、古巨基及梁漢文這「新四大天王」是「蟹黃」，華仔昨日表示Beyond多年來均想鞏固香港的樂壇，令香港音樂在亞洲地位得以提高。有記者指「新四大天王」的名氣不及當年的四大天王，華仔說：「如果佢哋鍾意呢個名，就要好好保護，唔係只係得個名，總之做好自己，個名就會自然嚟。」
採訪：駱華齡
攝影：葉君海
