阿董老竇董浩雲嘅日記由中大出版社出版，噚日開記者會同酒會，董家差唔多成家到齊。有份編書嘅董建平話，睇返爸爸嘅日記，講到佢嘅理想，以及念念不忘「振興祖國」（不過董浩雲啲船係扯中華民國國旗嗰喎），睇完都忍唔住喊，佢更發現爸爸原來好錫佢哋，連佢哋細個講嘅嘢都記低，但佢哋就丟晒老竇啲書信。
董浩雲對個大仔即董建華「期望」好大（的確，阿董冇令佢失望，不過令港人頹喪啫）。董建平話，建華個名喺日記出現咗千幾次之多，由於爸爸早期嘅日記已經散失咗，唔知佢喺阿董出世嗰日（即中華民國二十六年7月7日）寫過啲乜，但睇返啲資料，當日董浩雲應該講過話：「上帝賜予這生命，希望他發揚光大。」不過，高科技港、中藥中心，都冇發揚光大喎。
阿董冇講佢爸爸，董太就講咗兩句，話「印象梗係好『愛』啦！」，不過佢話自己未睇晒老爺本日記。
李鵬飛同馬會嘅夏佳理同董浩雲都有交情。飛哥話，董建平嘅老公金樂琦係佢同學，佢讀完書返香港先至識董浩雲，佢重話，董浩雲做嘢好決斷，真係擺明係潤阿董。
夏佳理話，佢七十年代見過董浩雲，覺得佢個人好細心。
（圖）有份編書嘅董建平話，睇完爸爸嘅日記忍唔住喊。
傳真︰2623-9278
電郵︰