八方早前講過李國章推三改四要單打獨鬥，因為問責高官好多都係港大畢業，不過，好彩太子章嘅對手唔少係中大人，佢哋就肯定舉手支持。
好似張文光咁，佢同八方講，佢係中大七八年經濟系畢業生，當年中大重係四年制，後嚟政府四改三，中大人反對得很，但係都冇用，係人都知讀四年大學好過讀七年中學，一切都係錢作怪，重有政治因素，英國殖民地，冇得傾。張文光等三改番四，等咗都有十年，𠵱家終於有機會！當年樹仁校長鍾期榮企硬，政府咪唔受你玩，時至今日，香港回歸祖國先有得「撥亂反正」，鍾校長亦都算守得雲開。
張文光話，佢好支持三改四嘅，但係李局長同羅范椒芬好貪心，又想一齊搞埋通識教育，又唔畀啲學校試行，咁大變動要人一次過全盤接受比較難，所以都係有排傾，佢希望李局長真心誠意聽吓民意，等好事可成真。
傳真︰2623-9278
電郵︰