「鐵爺」終於返嚟嘞！養傷近十個月嘅中國中場李鐵，喺禮拜一打和西布朗一比一嘅預備組賽事中打足全場，而且表現備受讚賞，雖然唔知佢幾時先可喺英超聯上陣，但總算係個好開始。
李鐵喺今年一月斷腳後，唞咗成十個月，到三個禮拜前先好番。喺禮拜一對西布朗場預備組比賽，佢被委任為隊長，兼打足全場；雖則佢幫唔到球隊贏波，但表現就備受好評。
之不過，李鐵佢要喺英超聯上陣，就唔係咁容易，事關對光頭「TWINS」卡斯利同加維臣今屆踢到上身，防守做得好之餘，重全共入咗五球，所以佢想攞番個正選位，真係唔容易。
但所謂「好嘅開始係成功嘅一半」，𠵱家李鐵佢嘅狀態開始返嚟，加上喺受傷之前算幾受領隊莫耶斯重用，所以我求大俠相信佢喺英超聯重有作為。
至於喺呢場預備組波同李鐵交手嘅日本中場稻本潤一就慘啲，買佢過嚟嘅美臣畀西布朗炒咗，新上場嘅白賴仁笠臣似乎唔多鍾意用佢，所以佢應會過返喺效力阿仙奴時嘅「冷板」生活。
曼聯嘅阿根廷後衞軒斯話佢係虔誠天主教徒，好重視聖誕同復活節，必定要同家人過節；但弊在曼聯喺拆禮物日同保頓打英超聯，所以佢就好唔開心。歐洲好多聯賽都會喺聖誕休戰，但英超聯就例外，既然佢選擇嚟英發展，就應該有心理準備，到時畀啲心機比賽好過啦！
希臘喺今夏創造神話攞咗歐國盃冠軍，但都係表面風光，事關佢哋除咗冇球員入選今年世界足球先生選舉最後三強外，好多球員發展麻麻。好似查列斯迪斯，喺不來梅只係後備；沙達斯重慘，自從七月約滿雅典AEK後一直失業，到日前先加盟德乙球隊科隆，認真唔掂。
朗拿度透露，○七年同皇馬約滿後有興趣到德甲落班，原因當地有唔少老友嘅巴西球員。乜佢唔記得講過想去英超波咩？之後記者叫佢比較德國國家隊爭位嘅門將簡尼及列文，就話肯定係簡尼好啲，可能係見世界盃射爆簡尼贏冠軍，○六世界盃又喺德國舉辦，先打好啲關係。
意大利聯賽會周一證實，現任主席加里安尼喺最新一輪投票，未能達到連任票數，需要重選新任主席。加里安尼同時亦係AC米蘭副會長，上季意甲聯賽多場AC賽事都曾經出現補時長達七、八分鐘情況，觸發唔少陰謀論。𠵱家加里安尼可能冇得坐呢個位，睇下重有冇得嘈啦。