香港電影市道面臨嚴峻考驗，有消息指寰亞電影公司明年會開拍八套電影救市，寰亞老闆林建岳表示一切未落實，但會「盡可能做番啲嘢」。而杜汶澤則炮轟張堅庭日前指港片完成歷史任務的言論不負責任。
香港電影工業正面臨空前慘淡，曾經叱咤風雲的港產片風光不再，有人提議演員應減片酬救市，杜汶澤昨日在灣仔出席大快活宣傳活動時說：「我覺得咁講好奇怪，因為我知道《無間道》入面，梁朝偉同劉德華嘅片酬好高，接近八位數，但聽公司講部戲都有錢賺，證明高片酬演員係有賺錢保證，咁不如花多啲心思喺創作劇本度。」
對於張堅庭日前指港產片同粵劇一樣，已完成其歷史任務，阿澤炮轟說：「唔明點解要問個賣雲吞麵嘅人，佢幾耐冇拍嘢？佢曾經都係電影人，咁講好不負責任，佢（電影）養過你啲老婆仔女，我睇完好心痛。」
張堅庭則在電話回應說：「我講香港歷史任務完成，係因為以前香港電影喺亞洲最開放、需求多、供應少，令到香港變得好蓬勃，不過之後亞洲好多地方嘅電影供應多咗，港產片就跌咗。」
張堅庭續說：「賣雲吞麵嘅都係觀眾，點解唔可以批評啲戲？阿澤嘅說話語不驚人死不休，我建議佢先學好語文同國語，內地有好大嘅發展空間。」
另外，日前寰亞電影負責人莊澄表示明年會開八套電影救市，寰亞老闆林建岳昨日在中環出席Beyond演唱會記者會時，指很多事情仍未落實。
林建岳說：「好多嘢都未決定，不過會盡可能做番啲嘢，好似兩年前電影市道唔好，我哋都開拍《無間道》，𠵱家內地市場開放，但盜版嚴重，最重要係要內地政府打擊盜版，同埋要拍一啲有水準嘅電影。」
此外，寰亞電影昨日宣布與有線電視達成協議，將寰亞電影製作的影片讓有線電視於香港區獨家首播，為期三年。
採訪：王連連、馮美茵、比華利
攝影：陳偉權
