旺角最新型場朗豪坊，未開之前經已係各潮人茶餘飯後的話題，現在終於開幕，內裏的潮舖多不勝數，更成為眾潮人的最新蒲點。但朗豪坊的宣傳攻勢未有停下來，近期更殺入玩具界，夥拍近年本地當紅組合鐵人兄弟，推出名為ShoppingBear的限量系列，更專誠為鐵人設立場館，實行來個商場×玩具首次Crossover！
記者：李崗華
攝影：楊錦文
朗豪坊為慶祝聖誕來臨，與鐵人兄弟合作推出名為「朗豪坊ShoppingBear」系列，系列共3個款式，以熊仔作藍本，再加上朗豪坊的建築特色。但這套只有三吋高的ShoppingBear系列只送不賣，只要一天內於朗豪坊購物滿$1,000即可獲得一隻「朗豪坊ShoppingBear」。此外，鐵人兄弟更請來20多位本地設計師及插畫師重新設計ShoppingBear，名為「MyDearBear」，更將這20多隻獨一無二的MyDearBear，與鐵人兄弟的新舊作品擺放於朗豪坊內供各人欣賞，所以話尚未決定Shopping與否，都可親身目睹這件香港玩具界的盛事。
（換領辦法：在同一天內於朗豪坊兩間不同商舖購物滿$1,000即可獲得）
鐵人：「首次做熊仔造型！」
有留意開鐵人作品的，都會覺個ShoppingBear的造型與鐵人一貫作風甚為不同，就連鐵人自己都係咁講：「今次ShoppingBear係一個新嘗試，因為係為朗豪坊而做，所以造型一定要令人覺得容易接受，熊仔嘅樣非常可愛，人人都會接受，所以選擇以熊仔為今次的Icon，但我哋經已設計多幾款不同的動物造型，或者日後會與朗豪坊再合作。」
直擊朗豪坊×鐵人兄弟三周年展覽！
展覽場館位於朗豪坊的十樓，原本為商場舖位，但朗豪坊特意延遲租出個多月，以供鐵人擺放展覽。
其他Artist設計MyDearBear
展覽另一個高潮位——二十多位本地設計師重新設計熊仔，成為獨特的「MyDearBear」。
利志達×MyDearBear
出自本地漫畫家的手筆，特別之處，係熊仔面部表情的一貫利志達繪畫風格。
林祥琨×MyDearBear
作品一向惡型惡相的林祥琨，亦將呢種風格躍於熊仔上，別有一番味道。
馬甄妍×MyDearBear
馬甄妍？她是鐵人三兄弟Winson的女兒，只有十多歲，但已能創作，作品更有板有眼，完全不似小朋友手筆。
何家超×MyDearBear
何家超不愧為登陸外國的創作人，將熊仔改為一架玩具車，是今次作品中最為矚目之一。
小克×MyDearBear
小克畫畫勁相信好多人都知，但估不到連設計玩具亦有一手，熊仔背後的長自動電梯就係專誠為朗豪坊而設。
鐵人最新產品！
每逢玩具展覽當然有玩具發售，今次鐵人的展覽亦不例外，當中最為矚目的，可算係鐵人的三周年版FigureSmartR-3及新版BigMac，想補購鐵人的舊作？場內亦有鐵人的舊作發售，而且更係原價發售，絕無炒價，鐵人迷會最為高興。
售賣點：旺角朗豪坊10樓（查詢：21670788）