買Notebook定Desktop好？呢個問題相信好多人都考慮過，決定之前最好問一下自己，對電腦認識有幾深？若果唔高，而又需要拎部電腦出外工作，Notebook自然係必然之選，相反，Desktop始終較經濟，彈性亦較大，如果動手砌機，可因應需要而增減硬件，更可以慳得就慳。
近年開始出現一些大尺寸屏幕，體形亦巨大嘅Notebook，即所謂DesktopReplacement，廠方原意就係希望用家代替Desktop，不過筆者就好懷疑其實用性，論屏幕大小，九成九Desktop現在都有15吋或以上LCD，論面積一定比大多數Notebook大，輸蝕嘅只係並無用到闊屏幕，呢類Notebook因為體形巨大，一般重量更去到7、8磅，拎住出街，真係可以練多幾隻老鼠出嚟，無咗Notebook流動使用嘅優點。另外，硬件一體化亦令到Notebook維修上比較麻煩，試想若果只是屏幕壞咗，Desktop只要換個芒就可以開工，Notebook分分鐘要入廠大修。Desktop仍然係我家中首選！
文：電腦奇俠
揀Notebook小Tips
1.體形、重量愈輕愈好
2.部份機種提供讀卡器，留意是否合用。
3.電池操作時間好重要。
4.同一個型號會因為配備光碟機不同而有出入，要問清楚。
5.多數拎出街用，外表亦好重要。
《吹吹IT風》以討論及分析熱門IT話題為主，由電腦、數碼相機、手機、AV產品到TVGames，都屬討論範圍，歡迎讀者提出改善建議、討論話題、疑難雜症，谷氣投訴甚至自薦發表文章都得，總之大家多多交流。