日股最低之時，指數散過136點，埋單只跌79點。港股唔睇日股，曾經升過，埋單恒指微跌7點。稍作整固後，個勢仍然向上。
國壽C輪：國指跌2.7點，收4967。去年12月，國企威晒，國指1個月內由3832殺上5020，怒升31%，冇任何其他指數夠佢嚟。博今年12月國企翻版，可以揀啲重磅股埋手。3隻保險股係芬佬股，最受資金推動之惠。平保（2318）升0.10元，收13.80元，唔聲唔聲又創新高。人保（2328）升2.5仙，收2.925元。國壽（2628）冇郁，收5.75元，喺5.80元上下形成平台已有3個禮拜，等炒格局，隨時破位而上，國壽C輪諗得過。
明年3月到期嘅國壽C輪，有4492與4524，向4492埋手。4492輪價53仙，溢價5.7%，槓桿率10.8倍（有效6.7倍），引伸波幅34.2%，數據靚過4524少少，4524交投則又贏過4492少少。熱門貨2143波動快，數據亦靚，但本月28日最後買賣，嫌太短期。
中信C輪：有得升嘅恒指成份股，中信泰富（267）係其中1隻，收22.05元，進帳0.20元。年初高位24.45元，𠵱家相差1成，有水位，搵C輪炒，有機會搵錢過聖誕。中信C輪可供選擇者唔多，最正路對象係4483，明年10月到期，夠晒長壽，輪價26.5仙，溢價6.7%，槓桿率8.3倍（有效4.9倍），引伸波幅22.9%。中信上番年初高位，揸隻輪可執40-50%。
新地C輪：新地（016）除息1.05元，收77.25元，實跌0.70元，跑輸其他地產股，估計好快彈番上去，跟番大隊。C輪2252收54仙，跌4仙，趁低入貨。
章盛