順豪資源近排染指唔少投資項目，又趁勢標售中環總部順豪商業大廈，噚日截標。
據悉，有四五個買家出價洽購，最高價三億，到達業主目標價。可惜最後賣唔成，因為順豪原本計劃以六億五，買入位置更靚嘅雲咸街八號做新總部，勢估唔到埋門俾南豐六億六截咗胡，換唔成貨，惟有收回順豪大廈，市場就咁少咗單大deal。
佢哋話，洽購緊嘅九龍酒店重未有結果。市場有消息話，業主大酒店最新索價二十二億，較最高標價近二十億高一成，但順豪話重傾緊，不便講太多住。
講番南豐截咗順豪胡嘅雲咸街八號，市場曾傳言話，南豐旗下財務公司，係呢幢商廈嘅按揭貸款人，不過，南豐噚日否認。
南豐發言人話，買入呢幢商廈，作收租用途，𠵱家呎租十八蚊，遲啲可見二十蚊，而且會進一步上升，另外係覺得售價重有得升。
以𠵱家回報率兩厘唔夠，真係要好睇好後市，至會出價咁勇。
寫字樓市道火熱，造價屢創新高，搞到一啲諗住自用嘅業主，都抵受唔住誘惑，賣樓賺錢算數。
屋之島商業部經理李思博透露，尖沙嘴康宏廣場南座二六○二室，約千二呎，二○○二年以四百萬連約成交，今年二月，以六百三十六萬易手。到十月約滿後，買家諗住自用，點知期間有客出高價洽購，最後忍唔住，用八百五十萬交吉賣出，每呎近七千一，係新高價。
李思博話，對上一宗高價成交係今年四月，二十七樓單位，逾一萬呎，成交呎價六千五百九。
SOHO中國喺內地有好多房地產發展，唔少設計風格獨特。SOHO‧尚都示範單位開放。該公司董事長潘石屹話，項目嘅牆、天花、窗戶同樓梯，冇一條線係直嘅，就算枱與書架都一樣。
SOHO‧尚都位於北京商業中心區西北角，佔地二點二公頃，建三幢、共二百七十個寫字樓單位同四百五十個舖位，總面積一百八十萬呎。由澳洲前衞建築師PeterDavidson設計。
利記每周公布王牌屋苑成交行情，上周十大屋苑以鰂魚涌太古城最突出，二十七宗買賣，比前周大增近一倍半。佢嘅排名，亦由前周第二位，躍升至上周第一名。前周冠軍沙田第一城，則退居亞軍，共有十五宗成交。
利記陳偉雄話，上個禮拜，太古城見投資者重新入市，購入三房及交吉期長嘅單位。
新世界中國喺內地有好多投資項目。「中國房地產Top10研究組」，上個禮拜六公布，評選新中為十大最具價值房地產公司品牌之一，重係唯一攞到呢個獎嘅香港公司。
新中喺內地十七個城市，發展咗三十六個唔同類型嘅住宅，同十四個商業物業，真係乜嘢檔次都有。
一年將盡，中記舉辦預測指數遊戲，估吓明年第一個禮拜，反映整體二手樓價嘅「綜合屋苑指數」幾多點。
集團四名董事率先參加，劉瑛琳估四十八點五點，為四人之中最低；阮錫章料四十九點九六；王浩聰話五十點；最樂觀係唐秉正，預測升至五十點五點。上周，指數係四十八點六二點。
聽講，中記遲啲會搵埋地產發展商，一齊參加競猜遊戲。
電郵地址：
