日本國寶級大怪獸哥斯拉已經有五十年歷史，而本月喺日本上映嘅《哥斯拉FinalWars》就係《哥斯拉》電影系列最後一集。前日套片喺荷李活舉行首映，哥斯拉重喺當地獲頒名人之星，成為荷李活殿堂級明星，而有份演出套片嘅菊川怜、TOKIO成員松岡昌宏同埋導演北村龍平等，都齊齊飛到當地為哥斯拉打氣。
哥斯拉喺日本家喻戶曉，佢個名喺美國都好響吓。前日佢喺荷李活嘅星光大道獲當地市長頒發名人之星，從此同米奇老鼠、賓尼兔、加利格蘭（CaryGrant）同埋尊榮（JohnWayne）等齊名，好威水。
嗰日荷李活市長話：「哥斯拉係日本最出名嘅明星！」當日重吸引咗超過二百個美國fans同哥斯拉慶祝，表現興奮嘅哥斯拉原本想噴火，不過為免整親人，就改為氣體，非常盞鬼。
而有份演出《哥斯拉FinalWars》嘅松岡昌宏同菊川怜都執到好靚咁見證呢個歷史性時刻，菊川怜嘅和服打扮重非常搶鏡。至於喺戲入面着住哥斯拉道具服嘅特技人喜多川努，嗰日難得可以用真面目見人，重有豪華房車送佢到首映場地㖭。