紅灣半島加西九龍，經已取代咗○七○八雙普選及公投問題，變咗民怨雙響炮！
冇得攬實阿爺大髀喊叫
老懵董遇着新問題。雙普選同公投，尚且有得攬實中央阿爺條大髀大喊大叫，紅灣半島西九龍，同政制民主無關，唔通又叫胡溫中央出手擺平？咁重有冇一國兩制？不如叫曾慶紅落嚟做特首、廖暉落嚟做政務司司長好過喇係咪？
紅灣半島變咗折墮騷，唔怪得長毛義憤填膺，高呼拆一層樓，向納稅人賠番五億！一個地產項目，變咗遊戲積木，咁益地產商，一鑊未夠再整多鑊，鬍鬚孫罪魁禍首，用八億公帑，賤賣大包，喺第二個國家，未使國會譴責，一早就知恥落台！
獨係呢個政府，敗港八年，早已唔知個恥字點寫咯。紅灣半島若然拆咗，搞到沙塵滾滾，污染生態！倒不如諗下有乜正面用途。
好多人話，香港唔夠博物館喎。嗱，保留紅灣半島，咪可以改為「特區十年浩劫紅灣博物館」囉！
有咁多個住宅單位，每個單位，用嚟展覽「回歸」後特區嘅血淚實物，例如：因「八萬五」禍港政策而被董團夥迫到跳樓燒炭嘅苦主封遺書、遺物、銀主盤樓契；重有自稱前路透社職員被裁員後偷竊嘅兩個麵包、每年施政報告總展覽（用螢光筆畫住阿董各項大炮：包括高科技港、中藥基地，同埋喺新界建設兩個「無煙市鎮」等白紙黑字、蓄意欺騙市民嘅謊言等等），禽流感風暴，由雞販抗議所用嘅雞籠，至於沙士大瘟疫，就要開闢成棟樓為專館，展覽三百名死難市民嘅遺照遺物等等！
連柬埔寨金邊、赤柬當日用嚟施刑殺人嗰間學校，都做咗博物館喇係咪？「特區十年浩劫紅灣博物館」即日裝修，紅灣新樓原樣保留，趕明年七一落成，恭邀胡錦濤、溫家寶、曾慶紅中央三公，親臨揭幕，由董伯主持，孫明揚做司儀，電視直播，你話幾好睇呢！
傳真︰2623-9278
電郵︰