曾經做過民主黨前身港同盟研究主任七年之久嘅劉世良，最近將喺《茶杯》做過嘅訪問結集成書，重以唱K嚟形容香港嘅政治。照世良講，卡拉OK政治嘅意思，就係似模似樣虛有其表，人人執咪都可以變成華仔、祖兒同志安，當然係欠缺實質啦。
八方諗，呢個都係拜「一國兩制」所賜，名有高度自治，實際係冇。香港政治嘅硬件係英國人留落嚟嘅所謂議會制度，至於軟件就離唔開喺中港兩地政治圈打滾嘅中國人，一定係咁嘅結局。
好似白鴿黨前主席馬丁咁，世良覺得佢個人冇機心，又唔識中國權術，似西遊記中嘅唐三藏，帶領住孫悟空、豬八戒同沙僧一班人去西天取經，可惜啲徒兒各有各盤算，而旅途又荊棘滿途，呢個比喻又的確維肖維妙。
八方唔知馬丁曾經想過退休後做法官，佢咁鍾意雄辯滔滔，會好難適應，馬丁話呢個係正路，不過今時今日年紀太大，四年後七十歲，法官做唔成，只好一世做大狀。
傳真︰2623-9278
電郵︰