無綫噚晚喺尖沙嘴舉行「長期服務暨傑出員工榮譽大獎頒獎典禮晚宴」，行政主席邵逸夫、董事及集團總經理何定鈞同埋高層梁家樹都有出席。
近日有傳梁家樹離開無綫過檔英皇，不過佢前晚一口否認，話自己好鍾意TVB，要効忠TVB咁話。講講吓佢竟然扯到個女、女生宿舍成員Toby梁靖琪身上，梁家樹話：「其實我唔鍾意個女入行，我想佢做普通人，想個女同啲正常嘅人拍拖。」
由於近日盛傳Toby同蕭正楠拍拖，難免令人聯想到梁家樹唔鍾意個女同蕭正楠來往。梁家樹又話：「個女出碟我都有買，但我覺得個女嘅形象唔係好突出。」而女生宿舍早排同fans舉行聚會，慶祝唱片有好成績。
另外，最近盛傳無綫會裁二百個員工同埋向製作部開刀，但何定鈞就否認裁咁多人，佢話：「控制成本係每間公司都會有，我哋會逐個部門檢討，據我所知都唔係咁大規模啫。」
尹天照噚日就涉嫌非禮王秀琳一案去秀茂坪警署報到，逗留咗一個鐘就離開。
尹天照話：「呢個月二十九號再到警署報到，不過我同警方講可能要改期，因為聖誕同新年係藝人搵錢黃金檔期，之前我已經度咗呢段時間去東莞。但如果度到期，我都會二十九號返香港報到。」
馬浚偉日前同葉麗儀去美加登台期間，收到前輩黃霑逝世嘅消息，馬仔話：「入行十年，霑叔一直睇住我成長，今次喺美加登台，我都唱過霑叔最鍾意嘅《兩忘煙水裏》，佢今次突然離開，我覺得好難過。」原來馬仔第一次主持電視節目就係同霑叔合作，佢話：「霑叔好錫我，但霑叔希望大家笑住咁送佢離開，我會尊重佢嘅意願。」
最近有雜誌影到張國榮（哥哥）生前摯愛唐鶴德同一中年女子打波，咁就傳佢有新對象，報道重話現場有女歌迷鬧唐唐負心。噚日哥哥前經理人陳淑芬幫唐唐發聲明，佢話：「大家都知呢位女士係我哋波友，呢啲傳聞好離譜，完全冇理人感受，重有呢位所謂歌迷，不時喺南華會騷擾唐生，所以若對方再騷擾，我哋會報警處理。」
那英男友高峰同王納文嘅「私生子案」又有新發展，喺雙方律師調查緊高峰嘅財政狀況之際，噚日傳出高峰有份投資嘅富邦大飯店破產嘅消息，據知呢間飯店因為高峰臨時撤資，所以暫停營業。有指高峰兩年嘅收入只有三萬六千蚊，王納文就唔係好信，佢話：「高峰的確交了他的收入證明，但只有近兩年他在天津泰達隊（高峰所屬足球隊）的收入，以前的收入一概沒提。」
著名繪本畫家幾米有多本作品被內地一出版社盜版推出，幾米早排向上海市第一中級法院提出起訴，要求出版社賠償約八十萬港元，前日法庭判咗幾米勝訴，除咗要出版社賠償六萬蚊外，重要佢哋刊登廣告道歉，但幾米所屬公司嘅總經理李雨珊就話賠償金額太少，但都接受內地嘅判決。
