「細哨」朗拿甸奴紅到發紫，而佢巴塞隊友拿臣雖然最近受傷，但開季以嚟都算幾風光。不過唔講唔知，呢兩位鋒將嘅母會最近都陷入低潮，計落都同佢哋離隊有關。
甘美奧係「細哨」成名地，呢隊波過去奪獎無數，不過球會○一年喺毫無計劃，加埋溝通上有問題，結果以四百五十萬美元價錢、經過冗長法律程序後將「細哨」賤賣去巴黎聖日耳門，球會自此一蹶不振；前日隊波迫和巴拉蘭尼斯三比三都改變唔到降班命運。拿臣效力多年嘅些路迪亦唔多掂，今季冇咗呢一位瑞典箭頭，繼輸畀宿敵流浪後，前日對鄧地又和波失分，今季第一次失去榜首位置，冇咗拿臣呢件入球機器，果然係差啲。
兩位星將嘅母會陷低潮，不妨效法薛高激勵吓母會球員。話說薛高早排呼籲過母會法林明高球員要爭氣後，隊波今季果然逃過降班命運。
前晚祖雲達斯作客國米場波，「首球」係由尼維特射波省中薩拉耶達改變方向入網，入後者數，你固然可以話薩拉耶達一世夠運。不過，初時個個都以為係尼維特射入，成班隊友都走去攬住尼維特；反而薩拉耶達揚晒手，最後得伊巴謙莫域去攬攬佢，做咗個好冇癮嘅入球者。
「波神」米高佐敦嘅軍人大佬占士都好似佢咁，唔捨得離開心愛嘅戰場；四十七歲嘅美國軍官占士要求超期服役多一年，以完成喺伊拉克信號兵旅嘅部署，佢認為目前戰事好需要佢咁有經驗嘅領導人物。占士嘅口氣簡直同當年佐敦復出巫師嗰陣如出一轍，果然係同一個阿媽生嘅！
球員俾球證出示紅牌驅逐出場有好多理由，但係好似皇家蘇斯達中場卡賓日前對拉科魯尼亞咁「騎呢」就真係少見。事緣俄羅斯老將卡賓完場前三分鐘被調離場，當時戰果二比二，佢慢慢步出球場，但球證突然出示黃牌，話佢拖延時間，「兩黃一紅」出場，認真無辜。
我求大俠睇電視直播，大部份聯賽都已經採用「黃色」足球比賽，但據修咸頓正副選門將投訴，就係因為個新波太飄，好難捕捉球勢而受傷；而禮拜日唔少比賽，好似碧咸、費高、阿朗素同美拿啲遠射入波，個波都飄得好犀利，睇吓嚟緊幾個月有無更多遠射入球出現喇。