黃霑上周病逝後，其女兒黃宇詩因心情沉痛而迴避傳媒，昨日她首度開腔，細訴對父親的思念，以及霑叔在人生哲理和中文方面給她的教誨。另外，本港三大唱片公司將攜手合作推出一套霑叔作品集，顧嘉煇為紀念故友而作的新歌亦會收錄其中。
著名填詞人黃霑上周三病逝，其孻女黃宇詩大受打擊，在父親離去後一直未肯向傳媒多講半句。直至昨日下午，身為無綫《都市閒情》主持之一的黃宇詩，終透過電話在《都市閒情》中細訴心情，憶述霑叔對她的教誨。
黃宇詩說：「自己難免傷心同傷感，呢幾日都掛住、好唔捨得爸爸，好彩都瞓得着，不過瞓吓醒吓，屋企人𠵱家都好平靜。」黃宇詩回憶往事說：「其實好多方面都受到爸爸影響，原來好多點滴、知識，所有都可以喺書本上學到，本來平時我好少睇書，但係因為爸爸嘅鼓勵我睇多咗。我十三歲移民，當時科技未發展，好多時都係同爸爸透過傳真機或者書信來往。
「一直以嚟佢都會改我啲錯別字，始終移民咗過去，中文又唔係好好，英文又唔係好，好似半桶水咁。我寫信返嚟，佢會教我點去寫番啱，有時返嚟度假，佢又會教我查字典，教我粵音韻彙，到今時今日好多廣東字唔識，都係查嗰本《粵音韻彙》。好多書佢又會介紹畀我，佢睇過嘅書又會轉贈畀我，入面有好多筆記，有佢嘅心得喺度，睇起上嚟就事半功倍。」
日前宇詩在一封悼念亡父的信中，談到以平常心面對無常的哲理，而這些都是從父親身上學來的，她說：「其實呢樣嘢有少少佛學，我自己好受佢影響，都幾鍾意佛家哲學，以平常心面對，唔好畀情緒影響自己決定。」
對於近日不少人透過短訊或電郵慰問，黃宇詩表示感激：「呢幾排我真係感到人間溫暖，好多人send好多短訊關心我，又收到好多電郵，好多謝佢哋。」宇詩早前與彭健新合作，主持《都市閒情》中的「娛樂健康新一派」環節，但拍攝完第一集後，宇詩便要請假處理霑叔的身後事。而彭健新昨為該節目錄影時說：「我今日錄影都唔知轉咗人，我都知道佢（黃宇詩）心情唔好，而節目又咁輕鬆，心諗唔知用乜嘢心情對待。」
霑叔入行三十多年，寫下無數經典金曲，為紀念這位詞壇宗師，環球、EMI和華納等多間唱片公司，將合作推出一套黃霑作品集，一盒三碟，除收錄霑叔填寫的四十首金曲外，由顧嘉煇作曲、鄭國江、潘源良和林夕填詞、溫拿樂隊主唱之紀念霑叔的新歌，亦將收錄其中。至於四十首金曲則包括《世界真細小》、《獅子山下》、《親情》、《上海灘》、《明星》、《忘盡心中情》、《兩忘煙水裏》、《滄海一聲笑》、《問我》、《點解手牽手》和《今天我非常寂寞》等等。
而張敬軒最近忙於將黃霑遺作《Blessing》製作單曲唱片，他說：「我想做一隻純音樂同歌曲，希望可以得到佢家人同意，送畀霑叔做陪葬品。聽講霑叔個仔重想成立一個癌病基金，我都想做啲嘢，諗住將呢首歌所有嘅收入捐畀佢哋。」
另外，無綫上周推出兩個紀念霑叔的特備節目《滄海一聲笑別霑叔》和《獅子山下念霑叔》，收視勁升，平均為二十三點和二十四點，即一百五十一萬和一百五十八萬觀眾收看。
採訪：戴彩煥
