退休高官最近在馬場碰到左丁山，適逢佢贏咗一場頭馬，非常開心，於是話要請左丁山飲茶。約來約去，搵咗三個禮拜，因為退休高官上咗打高爾夫球癮，時間與左丁山捉迷藏，飲茶約會惟有一路延遲。
呢日再碰頭，近距離睇真啲，退休高官面色好好，精神飽滿，覺得佢咁快就唔做事，唔為社會服務，實在可惜一啲，今時今日，六十零歲，唔算老啫。於是問佢：「T哥，點解唔重出江湖呀？以你嘅經驗才幹，喺商界搵份高職，唔會咁難噃。」高官耍手擰頭：「咪喇，我開頭都覺得自己好懶，想話再搵工，但去完環遊世界，一個禮拜打幾日波之後，就覺得曾蔭權、王永平等人唔值得羨慕，咁辛苦，為乜？佢哋搵錢多過我，但生活質素就係我好啲！」
問佢對最近啲諮詢多籮籮，鋪鋪一鑊粥，有何睇法？T哥有啲感觸：「講出嚟就係政治不正確，但環遊世界之後，覺得我哋香港大學出嚟呢批
AO，雖然好有能力，但國際視野不足，眼光睇得冇咁遠。以前夏鼎基、彭勵治呢啲人，真係厲害㗎，英國外交部、英倫銀行返過嚟幫手嘅專家，國際經驗豐富，知道喺其他殖民地撞過板嘅政策，就唔會貿貿然移植過嚟香港。𠵱家一國兩制，叫北京派人嚟，譬如話調戴相龍嚟香港金管局，一定俾人鬧到翻艇。從前我哋不時有教車師傅教路，犯錯係少啲嘅。肥彭臨回歸前，搞到一啲老經驗人士提早退休，𠵱家事後孔明，都唔知係唔係肥彭睇通個局，埋下伏筆。」
建華之亂，又關肥彭事？三十年後，史家自有判斷。