電單車專題：<br>哈利情侶新車落地即豪裝

電單車專題：
哈利情侶新車落地即豪裝

「電單車代步好方便，車價平，耗油量又低，真係好抵玩。」呢幾句都會係一般鐵騎嘅心聲，但絕對唔係玩哈利嘅目的！好似呢兩位新進嘅哈利情侶車迷，平時代步揸日本車，假日玩樂先揸架哈利出嚟威威，而且買咗車唔夠一年，已經用咗幾萬蚊改車，齋計改車費已經夠買一架05年新款綿羊！

記者：馬慶武　攝影：陳偉強

哈利男朋友Ken4萬豪改仿美國警察
阿Ken嘅愛驅係Harley-Davidson嘅ElectraGlide，04年用咗差唔多二十萬買車，新車落地即花了四萬幾蚊豪改。車頭真皮FairingBra連風擋、超閃令電鍍引擎蓋、尾喉、油缸蓋等必改項目全部有齊，當中美國警察用嘅巡邏閃燈及引擎蓋更係喺美國專程訂返嚟，喺街轟炸、巡航、搶收視絕唔成問題。

800磅巡航車馬力暴增
不過原來阿Ken除咗要型之外重對速度有嚴格要求，最貴嘅改裝項目並唔係外觀部件，而係引擎內部，阿Ken花咗兩萬幾蚊換上哈利改裝名牌Screamin'Eagle出品嘅BigBore，包括中缸、遮鈴等零件，將原本1450cc嘅ElectraGlide改成1550cc，馬力即時暴增二十幾匹，再加裝原廠油冷系統，令呢部重量接近800磅嘅重量級巡航車性能更強勁！

哈利女朋友Eva為揸哈利舉啞鈴
哈利出名夠重型，嚇怕唔少「奀吱吱」女騎士，所以全港只有唔超過二十位哈利女車主，Eva係其中一個，新車落地半年亦應該係最新一位。之前揸開輕型Chopper本田Rebel250，轉揸咗cc及重量暴增嘅入門級哈利Sportster883嘅Eva話：
「其實自己好想試吓揸呢個超經典品牌出品嘅Chopper，都有少少受男朋友影響。不過架車真係好重，所以𠵱家得閒會舉吓啞鈴，希望操控得好啲。」

改短避震再扮靚
除咗為揸車舉啞鈴外，因為Eva唔算太高，所以買咗架車返嚟第一件事就係改短避震，之後先再為愛驅扮靚。但係架車咁重，跪低咗點算呢？
「試過一次啦，阿Ken幫我扶番起囉！」
架車咁大，泊位咪好煩？
「哦！無問題！阿Ken會幫我泊！」
哦，原來自己練大隻之餘，最好都係揀番個大隻男朋友！

Eva'sSportster883

矮身哈利一樣型

■全車最平嘅配件：娃鬼回魂公仔，綁佢喺前Fork其實都幾驚嚇㗎！

■雙人皮Seat，同樣係加裝配件，方便招呼親朋戚友一同享受哈利風情。

■Screamin'Eagle嘅重低音排氣喉成為哈利最熱門嘅改裝部件。



Ken'sElectraGlide

哈里專用配套

■拆咗13吋長嘅避震改換上11吋，細粒女騎士都可以雙腳落地。

■真皮油缸套，作用係保護油缸免被刮花。

■喺美國訂返嚟、專為加於哈利引擎外嘅銀骷髏頭HeavyMetal感覺極重，同經典哈利Chopper襯到絕。

■揸緊ElectraGlide嘅Ken仍念念不忘100周年版，故特意換上百周年紀念版油缸蓋。



其他型爆裝飾

■刻上Police的電鍍油缸蓋，同係美國警察車嘅專用部件。

■出自Screamin'Eagle改裝嘅孖喉除咗可以加強性能，當然唔少得超重低音嘅排氣聲啦！

■車頭真皮FairingBra，係全車最搶鏡嘅配件，夠晒氣勢。

■尾沙板加上薄皮，可載人又唔會影響單Seat感覺。

■表板除咗轉數表、速度表、油計等基本嘢外，亦加裝上溫度表。

■要加裝油冷系統先可以將馬力、扭力俱增嘅引擎發揮得淋漓盡致。

■沙板頭電鍍部份，晚間會隱約透現出發光嘅骷髏頭標誌。

哈利情侶玩後感
阿Ken話：揸哈利最正係揸得舒服又矚目，不過咁大咁重嘅車代步就唔係好啱，所以平時會揸本田CBR900。
Eva話：希望多啲女騎士加入哈利行列一齊玩，雖然真係幾重，但只要停車時擺直架車，起步之後都好輕鬆。」

查詢改裝配件電話：28068182
哈利－大衛信香港（總代理）ServiceCentre

P牌哈利迷保費僅二千幾
揸咗哈利半年嘅John
「呢個品牌有超過百年歷史，擁有哈利就好似擁有埋架車嘅History，感覺好Classic，而且我成日要出外公幹，去唔同嘅地方都會搵到啱哈利用嘅部件返嚟，覺得哈利好世界性。」
原來P牌出哈利嘅第三者保費一啲都唔貴！以John為例，佢夠年齡（25歲以上）、夠牌齡（逾3年私家車牌），就算係P牌，第三者保費都係二千幾蚊！

嘉蘭圍車Show花絮
由尖沙嘴嘉蘭圍街頭騷社團主辦嘅「DreamCar化妝舞會@嘉蘭圍」，啱啱過咗嘅星期日就由哈利電單車做主角，之後12月12日會再搞，當日嘅主角預定係ChopperUnion車會，負責人林小姐重話Mini、甲蟲會陸續登場。

■當日除咗有哈利車主同愛驅撐場外，亦有05年哈利最新車系展出。

■場內有一個小角落展出有關哈利嘅物品，不過數量唔多，到場都係以睇車為主。