著名練馬師告東尼喺自己九肚山間豪宅被賊打到頭都穿，聽講情況已穩定落嚟。相信好多馬迷都希望告東尼早日康復，特別係佢位隔籬鄰舍李鵬飛，因為佢隻馬「東海龍」都係交畀告東尼訓練。
飛哥好多年前都曾經被匪徒跟住佢架車入屋苑打劫，幸好冇大礙，之後屋苑當然加強保安，不過住得沙田中半山，都預咗唔係好安全咯，耐不耐一單半單啦，告東尼個屋苑只有四間屋，又近山邊，啲賊容易爬入去，飛哥自己間屋就位置高啲，不過都係小心為上。
飛哥噚日去咗澳門，為一個協會講「管理之道」，飛哥話一早答應咗朋友，唔去唔得，所以上晝去下晝返。澳門人嘅鬥心同上進心都好強，最近不時請港人去教路，邊科都有。飛哥都話澳門𠵱家欣欣向榮，乜人都唔夠，特別係管理人才，所謂世界輪流轉，港人去濠江搵食彼彼皆是，今時今日已經唔係新聞啦。
傳真︰2623-9278
電郵︰