馮仁昭四圍超：
安仔暗寸Beyond踩天王谷個唱

樂隊Beyond三子日前直言譚詠麟點名嘅新四大天王名不副實，身為當事人之一嘅許志安對件事睇嚟好唔滿意，重暗示Beyond為演唱會博宣傳。

「佢哋不嬲憤世嫉俗」
前晚許志安同謝霆鋒喺電視城演出《勁歌金曲》時，霆鋒知道有新四大天王後，即刻大叫：「喂，許天王，過嚟影合照！」當時安仔重笑笑口行埋去影相，好受落咁款。
點知許志安噚日喺會展出席國際獅子會活動時，睇過有關Beyond踩新四大天王件事後，佢就話：「面係校長（譚詠麟）畀，架千祈唔好自己丟。我只想做番許志安，所以冇壓力。」
至於黃貫中（阿Paul）指天王係蟹黃，安仔就話：「我不嬲好欣賞阿Paul，我啲碟都有佢嘅作品，我噚晚見到家強都冇嘢，佢重好nice。我諗佢哋唔係踩，係講意見、講笑。如果真係踩，我會對佢哋好失望，樂壇應該團結，唔應該踩。我同阿Paul都熟，會打電話問佢，Beyond不嬲處事都憤世嫉俗。我冇唔開心，都明佢哋出發點，佢哋就嚟開演唱會嘛！」安仔言下之意即係話Beyond博宣傳？安仔即刻話：「你講咋，我冇講呀。」
此外，阿Paul前晚喺銅鑼灣搞音樂會，吸引百幾人圍觀，因靠近維園，好多重係菲籍女士，阿Paul好搞笑咁話：「菲律賓同馬來西亞啲人音樂感好強㗎，或者我可以喺菲律賓殺出一條血路。」

唐季禮變地產董事
導演唐季禮最近被茂盛控股有限公司邀請，由上個禮拜五開始，擔任呢間公司嘅獨立非執行董事，為期一年。約滿後雙方依然繼續合作，不過任何一方如果唔想合作，就要預早三個月通知對方。呢間公司主要係做地產發展同埋證券投資同買賣。

任白徒弟仙姐家共聚
噚日一班任白嘅徒弟友好去咗白雪仙香閨，一齊為紀念任劍輝忌辰食餐飯兼陪吓仙姐。龍劍笙（阿刨）最早到，佢話帶咗花送畀師傅，呢次陪仙姐食吓飯，但唔打牌。冇幾耐梅雪詩（阿嗲）亦帶埋鮮花齋菜嚟到，佢話未知會唔會再搞紀念活動，要由仙姐決定。

林冰下月十號出殯
專欄作家林冰上星期喺屋企猝逝後，噚日收到電話，先知冰姐嘅喪禮下個月九號會喺九龍世界殯儀館舉行，當日設靈，十號出殯，佢啲朋友已經諗住喺頭七同佢打堂齋。
冰姐喺娛樂圈嘅人緣都唔錯，所以佢出殯嗰日都會有唔少圈中人去鞠躬。其實冰姐喺生前曾經有出版社搵佢出自傳，不過佢最終都冇答應。

大S寫出減肥辛酸
徐熙媛（大S）最近出新書《美容大王》，大爆佢出道多年點樣令自己變得更靚嘅秘方，重講唔少佢嘅減肥經驗，例如佢試過重五十二公斤，有位日本女藝人同佢講話食蘋果加乳酪嚟減肥，可以十日內狂減十公斤。於是大S照做，點知食咗三日就肚痛入院。