前晚君悅酒店真係熱鬧,由政務司司長曾蔭權太太曾鮑笑薇同名媛張王幼倫搞嘅「明朗歡樂處處聞」音樂會,主打演出當然係郎朗嘅鋼琴演奏啦,呢個音樂會成功為明愛醫院籌咗一千三百五十萬。
前晚大批官紳都慕郎朗大名而嚟,啲司局長夫婦着晒中國衫都幾特別,但最出位嘅都算係孫明揚嘅「大老爺」裝束,孫大老爺一出現,煲呔同馬時亨嗰類中山裝就當堂失晒色,而孫太件fur當然就更勁啦,不過小心同紅灣半島一齊俾環保分子鬧埋一份!
郎朗被問到外界成日將佢同李雲迪比較,佢就好醒咁話:「我與他年紀相近,又同是彈鋼琴的,給人作比較是很正常的,一般比較的評論是可以,但請不要太過火,否則對我與他都會造成傷害。」前晚個音樂會請柬寫明六點準時開,大會真係冇花假,六點後到嘅名人都冇面畀,好似「蘭桂坊之父」盛智文同小提琴家姚珏就要企喺大堂睇電視。
傳真︰2623-9278
電郵︰