差點忘記恭喜黎姿，如果唔係佢自己開口講，實在想不起黎姿後生細女已經入行十八年，十八年啊，一段不短的日子。
香港是一個彈丸之地，想紅想出名實在唔係好難，求其除晒衫褲喺大球場跑個圈，或者喊苦喊忽在法院門外排隊等聽偶像受審，大小傳媒定必圖文並茂大肆報道一番，擔保能紅個一天半日，但之後點？
曾聽圈中前輩說過，想出位、想紅一陣並不難，難的是如何sustain紅、如何keep住紅。觀眾是善變的顧客，很快便會看厭，但顧客永遠是對的，觀眾要變心跟天要下雨、娘要嫁人一樣，是沒法子的事。一個藝人要持續得到觀眾的支持，最起碼的便是要努力、硬頸、唔忿「巢」，其實藝人在得到獎項前及得到獎項後，演技上未必有很大的分別，但運到了人便會發亮，舉手投足也別有味道。運氣只會降臨在肯努力、有鬥心、相信自己與肯去拼搏的人身上，欠缺了是但一樣，根本未等到運氣來臨便棄了權，離開了賭桌。黎姿緊守崗位，keep住靚，敢嘗試，肯吃苦，等到時來運到，終於勝了漂亮的一局。
黎姿得到最珍貴的未必是那個獎座，反而是有機會在數千萬觀眾面前，淡淡定定地講了一句：「啲人成日話黎姿唔得，終於我得咗！」
幾型！