港股真係冇得停，小跌3日後，又再大升，恒指重上14000大關，最高14111，收市14066，都係今年嘅新高紀錄。期指結算日，好友再度發功，贏得漂亮一仗。大市升浪再現，年底前可向14500至15000區域推進。
藍籌股以長和系表現最突出，長實（001）收74.75元，升1.75元，和黃（013）收69元，升3元。大股東李嘉誠長時間增持和黃，實際上已畀足貼士，相信除中國有意洽購赫斯基石油，以及3G業務前景樂觀外，日後好消息重會陸續有來。
大行推介和黃，評級調升到「買入」同「優於大市」，目標價由80元至84元，即係重有好大嘅上升空間。
國企股普遍上升，國指則收4970，升35點。噚日早段仍係以鋼鐵股表現較突出，但收市能有進帳的則只有鞍鋼（347）升2.5%同重鋼（1053）升1個位。馬鋼（323）早段曾衝上3.30元，但因近日升幅太大，結果回收3.10元，反跌2.3%。不過，鋼鐵行業今後1年重係大好景，中線持有鋼鐵股，賺錢機會頗大。
傳統的二線紅籌股亦發力，中國海外（688）收1.88元，升2.7%；粵海投資（270）收2.0元，升3.6%；越秀投資（123）收0.80元，更大升8.1%。走勢以越投最勁，突破由今年4月開始的大圓底頂部阻力，且有大成交配合，中線量度上升目標指向1.0元水平。
越投本來多元化經營房地產、造紙和收費公路業務，自收購廣州市城市建設開發集團後，主力便以發展廣州房地產為主，未來可供中期發展的土地儲備達360萬方米，由於市場預期廣州物業市道未來幾年將會穩步上升，越投以其擁有龐大土儲的優勢，肯定會成為最大的受惠者。
其實，以越投現時的盈利和淨值來衡量，例如預測04年（12月年結）盈利3.1億元，每股盈利4.9仙；以及每股資產淨值（04年6月底）1.16元，實在不算太吸引，但由於土儲以頗廉價買入，有接近3900萬方呎，以每方呎升值100元計，單係土地重估便增值39億元，已相當整間越投市值的80%，亦即每股增值0.6元。
近期有大行推介越投，中線可見1字頭，並非無因。
郭兆誠