聖誕燈飾陸續亮燈，情侶一雙或者成班Friend出嚟玩豈能不拍照留念？但人逼逼又多人影相，眼明手快霸到靚位，主角們兩秒就位，發覺個畫面攞極唔靚都要監粗影完閃，免得阻住下家上場，結果嘥咗個靚景。所以我哋今次同你做定Reseach，揀定幾個靚位俾大家即時就位，包保冇死。
記者：陳慧敏 攝影：周旭文、楊錦文
Models：Karie、Candy、Rome、Johnny（StarAsia）
今年至正賞燈點當然是誇張到暈的「直升機觀光夜遊」，腳印印俯瞰你班蟻民，靚位頭四位盡入眼簾夠寸！年年搶鏡的HarbourCity，有大型機動裝置，強勁音樂同人潮力撐，可謂坐亞望冠！還有尖東百周年紀念公園同海旁，「對聯」式燈飾雖然年年「差唔多」，但亦最有地道特色，一樣唔影唔得！
做天空霸王影最靚景點
直升機由西九龍直升機場，經昂船洲、上環、IFC、會展、銅鑼灣，繞過尖沙嘴九龍半島，橫越維港回航。兩岸金光比平時更甚，IFC跟旁邊聖誕樹都好搶眼。不過直升機上影夜景確有一定難度，畫面震在所難免，為免影響機師，機內嚴禁用閃光燈，所以除了用夜攝功能、ISO校到最大用最快快門最小光圈外，大家可利用機內的小燈泡，或像Karie一樣帶定電筒自助「打燈」，咁就前後景都咁靚！
港聯航空「直升機觀光夜遊」散客服務
日期：即日至05年1月2日
時間：逢星期六、日及平安夜晚，7:00pm-9:00pm
收費：$980/12分鐘旅程一位
包機服務
時間：逢星期六7:00pm-9:00pm
收費：$4,800/15分鐘旅程六位
查詢電話：
星期一至五：21089979/21089910
星期六、日及公眾假期：21089899
HarbourCity最長飛空艇
今年HarbourCity的機動燈飾，正申請列入《健力士世界紀錄大全》全球最長聖誕燈飾。飛船飛過二百呎機動燈飾長廊飛達五支旗杆，自然吸引人潮在鏡頭前左穿右插，旁邊還會有大堆背脊陪影，遮掉聖誕樹跟士兵公仔。飛船在走廊盡頭停留約10分鐘供人拍照，但其實最靚影相位乃飛船路經第二格之時，站在第二格對出小斜級位置，就剛好連同HarbourCity金碧輝煌的入口攝入鏡裏，讓畫面豐富得多！此外，40棵5呎高的彩色聖誕樹更於12月10日至1月7日期間布滿海港城KidX供大家拍照留念。
「萬彩聖誕街」日期及時間：
即日起至12月15日
6:15pm-9:45pm
12月16日至05年1月5日
6:15pm-10:45pm
（逢15分、45分表演一次）
查詢電話：21188666
百周年紀念公園搵棵大樹好避震
唔老土，百周年紀念公園簡直是香港有燈飾以來最經典影相靚點。站在富豪酒店對出，廣場休憩木櫈區前拍攝，比在噴水池前更能清楚拍到東海商業中心、新文華中心及南洋中心外牆燈飾全景。沒腳架的話，倚着這裏的樹幹正好做個倚傍防手震。
亮燈時間：6:00pm-11:00pm
TimeSquare畫面最Grand
今年TimeSquare最易影到靚相，以維多利亞時代做設計意念，處處禮物盒的燈飾最金光燦爛，連閃光燈都可不用。2樓大堂50呎巨型聖誕樹也是拍照靚點，好多人一開始就貼實棵樹影合照，影不到聖誕樹全相，站在樹前約4米處，比較容易攞到聖誕樹「全相」。
「閃爍時代夢幻曲」
日期：即日至12月26日
時間：6:00pm-11:00pm
IFC簡單「環球聖誕」
沒假期外遊？國際金融中心的「環球聖誕」，一口氣讓你逛遍德國、芬蘭、墨西哥、美國紐約、意大利及英國六個國家的傳統聖誕場景，附設的輕觸式螢幕，更介紹該地聖誕資訊。場地光線充足容易影之餘，立體擺設可謂「個個角度都有嘢睇」。高7.5米、重900公斤，以上千鏡片砌成，全港最大的聖誕老人今日會跟大家見面。來一招「低炒」，或者二樓都是靚靚影相位。
「環球聖誕」展出日期及時間：
即日至05年1月2日10:00am-10:00pm
栢麗購物大道每年都吊滿燈泡，像下着一場流星雨。要影到滿天星的效果，當然又要「低炒」。
除中東聖誕市集外，還展現多個耶穌故事的場景，意大利運來的陶瓷人物造型維肖維妙，來一輯「中東之旅」也不錯！
全港最高聖誕樹當然走不掉，由大招牌影過去，影到棵樹同IFC差唔多高呀！
對攝影有研究者、手持避震相機者，拍攝夜景燈飾當然難不倒你。假若你自認是攝影初哥，以下三個要點可能幫到你。
1.腳架
影夜景，有腳架防手震當然萬無一失，冇的話可以倚住牆壁、燈柱或鐵欄，一樣可以防手震。或是將數碼機的感光度提高到ISO400，但雜訊會增加。
2.位置
一般數碼相機，其閃光燈力量大概可照亮距離相機2米的人影，所以別以為企到貼實個景就可以影到靚相，企近啲個鏡頭，人同景都可清楚入鏡。
3.閃光燈
只影夜景不用閃光燈，盞嘥電。若目標物夠光（如TimeSquare）就別開閃光燈，否則反而會爆光。