期指結算日，個市又試嚟過。今回由滙控（005）、和黃（013）與中移動（941）充當火車頭，總共帶動恒指上升120點。其他30隻藍籌，只係總共升咗51點。12月期指高水46點，而大市又係由最重磅嘅藍籌，睇樣係挾淡倉，空軍遲吓有可能頭破血流。
中銀C輪：以收市恒指計，大市已破上周二高位（14023），自然亦破埋今年3月高位。中銀（2388）收14.60元，升得5仙，同52周高位15.65元重有段距離，有條件追落後，搵中銀C輪短炒，係搵銀之道。
對象冇得點揀，得隻9169，明年2月到期，輪價23.1仙，溢價0.6%，槓桿率6.3倍（有效5.8倍），引伸波幅25.3%。正股見番52周高位嘅位，隻輪見33仙，上升空間43%。9981數據都唔錯，但買賣完全比唔上9169。
恒生C輪：恒生（011）收109元，冇郁，同近期高位109.50元相差好少，同52周高位111.50元相差2.5元。銀行水浸，趕存戶出街，存戶唔收似有還無嘅利息，買高息銀行股好順理成章。
兩隻恒生標準C輪9949與2235都有5%進帳，9949下月14日屆滿（下月8日最後買賣），輪價95仙，溢價0.5%，槓桿率11.5倍，平水輪唔使理有效槓桿率。正股下月15日除息1.10元，唔關佢事，數據唔使調整。呢隻到咗末日，要買就買2235，明年4月夠鐘，輪價89仙，負溢價0.1%，槓桿率12.2倍（有效8.1倍），引伸波幅24.8%。恒生C輪始終交投太靜，好少市場參與者，要鋪鋪「甩牌」，首選始終係交投活躍嘅滙控C輪，反正大致上滙控同恒生都係同進同退，齊升齊跌。
章盛