真係多得花旗認錯兼轉view，大幅調升信德（242）目標價至9.20元，澳門賭業概念繼續有運行，連帶好多無厘頭細價股都借機炒作一番。
噚日急升的細價股中，御泰國際（155）升35.29％，收0.115元，成交股數9393萬股，金額1010萬元。公司話唔知點解股價波動，但市場就傳聞多多，當中自然唔少得賣殼。不過，隻股曾在月初配售新股集資，唔排除係有炒家收到股票後，炒高出貨。
御泰國際喺11月初，配售3.4億新股，每股作價4仙，集資金額只得1360萬元，但成手貨佔擴大後股本的15.93%咁多。由於御泰大股東早幾個月傳聞多多，除非係有膽量兼了解內情的炒家，否則唔會無端白事去認購，家陣御泰股價升咁多，認購新股的投資者帳面賺大錢。
至於名字相近，又係相同老闆的御泰金融（555），股價雖然都升27.91％，收5.5仙，但成交就明顯細得多，加埋都係得27.7萬大銀。
慕容小初