荷李活金像女星妮歌潔曼（NicoleKidman）同電影《情陷紅磨坊》導演巴茲魯爾曼（BazLuhrmann）為ChanelNo.5製作嘅話題廣告，唔止大受各方注目，更加令妮歌打入咗五十周年紀念版嘅健力士世界紀錄大全，成為全球最高薪酬嘅廣告女星，認真巴閉。
妮歌潔曼近年事業如日方中，荷包自然豬籠入水，佢為ChanelNo.5香水拍攝嘅廣告，原來收咗三百七十一萬美元，即係大約二千八百八十萬港元。而個廣告只係得四分鐘長，即係妮歌平均一分鐘可以賺七百二十二萬港元，所以最近推出嘅五十周年紀念版健力士世界紀錄大全，就將佢列為全球最高薪酬嘅廣告女星。
雖然條數話咁計，事實上，妮歌當然唔係企喺鏡頭前四分鐘就可以收呢二千幾萬，為咗滿足廣告導演嘅嚴格要求，曾經為拍一個鏡頭NG咗二十七次㗎！
此外，最近盛傳妮歌同伊莉莎伯凱莉（ElizabethHurley）個前男友史提夫冰（SteveBing）行得好埋，最近重俾人發現佢哋一齊喺洛杉磯同班朋友過感恩節㖭。