朗豪坊終於正式開張，引來城中哄動，好多食腦一族都立即飛身去索料，睇吓個場有幾咁巴閉。水貨大亨袁仁祥亦第一時間落巡場，喺門口個藝術雕塑HappyMan前，點起日本機場買嘅免稅香煙，仿似滿懷心事。行家路經正想問佢新舖幾時開張，祥哥漫不經意答道：「本來一早開咗，不過師傅叫我呢兩年內唔好開第三間舖住，咪惟有臨時退番囉。」祥哥夾着水貨煙同時用尾指挖着耳垢，繼續發表：「其實朗豪坊呢個場唔錯，人流夠晒，啲舖質素又掂，不過唔知點解，台灣嗰隻『波打國際』竟然楔到位於場中闢專櫃？呢個牌子與日本正宗Porter袋極度相似，個名只有『國際』同『東京』呢幾粒字唔同，就算㗎仔，驟眼睇落都會以為係日本貨，但『國際』其實價錢平緊一截，質料同正宗貨有名顯分別。
「有熟客見到我都問起，我咪答：佢當然唔係來自日本，正宗日本Porter只於銅鑼灣StyleHouse同Sogo有專門店，朗豪坊並冇得賣。所以大家買前真係要搞清楚！話晒香港係國際大都會，係購物天堂，邊個影響到邊個都唔好啦。」
祥哥同時講第二單料，佢話朗豪坊好多租客都豎起手指，話生意額叫人滿意！不過業主亦執得好緊，最近發信要求租客盡量11點後先好收舖，免得個場太早冷清清。原來之前租約寫明租客要營業至夜晚11點，話晒旺角係不夜城嘛。所以話朗豪坊班搞手都算醒！
主持人：大食Jack
八卦熱報：