台灣名模林志玲前日旋風式訪港一日，佢下晝同由佢做代言人嘅Angelface開完會後，傍晚就去咗中環置地掃貨，唔知係咪大忙人冇乜時間，林志玲只係喺BCBG試衫，試咗一個鐘，着咗超過十套衫，大部份係晚裝同低胸裝，凸顯佢嘅美好身材，大班傳媒聞風而至，企晒喺門口影相，本來喺試身室試衫嘅林志玲，都好識做咁行出試身室幾次，等大家影到相，抵佢紅嘅。
林志玲出入置地時着住大褸同披住頸巾，唔喺咁多人認得佢，亦都冇fans走去攞簽名，反而佢匿喺店舖試衫嗰陣，就有近十個台灣遊客咁啱行過，一眼就認得佢，重圍晒喺門口同記者迫住影相，馮仁昭問其中一位遊客，林志玲喺台灣紅成點，佢就用國語答：「很紅很紅呀。」
林志玲試完衫離開時話今次嚟港主要係同客戶開會，夜晚有時間就去贊助商度揀衫，準備稍後出席活動時着，問到嚟香港有冇同啲電影人傾拍戲，佢就話：「不會了，我只來一天。」
朱茵日前接受雜誌《MAXIM》訪問，講番以前讀書嗰陣，有好多男同學鍾意跟住佢返屋企，就算阿媽同佢一齊，啲男仔都照跟，重會喺隔籬講嘢引佢笑，佢話自己少女嗰陣就鍾意啲有男人味、粗獷同運動型嘅男仔，比較着重男仔嘅外表，佢重話自己嘅初戀情人有啲似超人基斯杜化李夫。
薛家燕同張敬軒噚日喺青衣城出席足健活動，提到蕭笙病逝，好姨就大讚蕭笙為人淡定，對新人提拔有加，佢重話：「之前我喺麗的時代有同佢合作過，我哋成日都見面，佢可以話係睇住我大。我有乜解決唔到嘅事都會去搵佢傾，而佢通常會話：『無事嘅，定啲嚟，每件事都有解決嘅方法。』」
黎姿噚日接受車淑梅喺港台嘅訪問，提到自己十幾歲已經諗到要搵個好歸宿，記得佢同初戀情人黃玉郎拍拖時，係欣賞對方嘅才華，當年黃玉郎要離開佢，佢簡直係晴天霹靂，喊到死死吓，重曾經諗過自殺，而呢件事令佢留下陰影，覺得凡事都冇安全感。
任達華噚日出席喺葵青舉行嘅仁濟動感文學藝術之《岳飛英雄傳》舞台劇活動，華仔話今次活動係想借岳飛對國家嘅忠心，宣揚正確嘅人生觀。
任達華話：「A係最頂級嘅，我覺得做人最重要嘅係個A字，即係Attitude態度，岳飛係一個對國家忠心嘅人物，我好鼓勵青年人去睇，因為可以從中學到做人的態度。」
