初冬天氣，正係舉行戶外活動嘅好時候，繼上周和黃舉行咗員工同樂日後，噚日又輪到電訊盈科，幾千人齊集喺深水埗運動場玩遊戲，十分熱鬧，而且重有嚟自廣州同北京嘅員工一齊玩。
不過小小超就未有學佢老竇咁「親民」，噚日並無出席員工同樂日，只由副主席兼董事總經理蘇澤光做主持。會上積蘇同員工講，希望公司前景同噚日天氣一樣風和日麗；佢又話公司業務發展除咗要有良好嘅策略外，更要團隊嘅合作精神，佢好希望同事噚日喺運動場上嘅拼搏精神，都可以帶到工作上，為公司再次創造奇迹。點解啲講詞咁熟口熟面？上年佢都好似講類似咁嘅嘢。
至於另一位副主席袁天凡，剛喺北京出席完佢舊同事馬時亨局長搞嘅保險業資金運用研討會，呢兩年佢主理嘅盈保投資收益回報理想，嚟緊國內又開放保險業到海外投資，自然吸引到好多人捧場。咁佢點睇國際投資環境？佢話今年市場較為波動，所以盈保持現金比例達24％，咁講會唔會令人失望呢！
傳真︰2623-9278
電郵︰