上個周末，小初原本想過濠江一遊，感受一下當地賭業究竟有幾興旺，為何會令本港股民如此瘋狂，但女友話似樣啲嘅酒店都爆滿，差些少嘅佢又唔肯住，惟有留低喺屋企睇電視，難怪間間公司都話要去澳門投資。
至於揚言會使20億銀去澳門投資酒店的富豪酒店（078），近排走勢相當硬淨。經紀陳話，一來炒家之前賺到錢，所以將資金轉炒富豪；二來江湖傳聞富豪或有抽水行動，股價硬淨可能屬事出有因。
富豪未有濠江概念之前，單係富豪海灣好賣同埋本港酒店入住率回升，其實已經夠晒藉口炒作，但既然呢排時興濠江概念，多樣藉口亦無妨，呢排特別多證券行幫富豪出報告推介，似乎係有心人在幕後發功。
至於抽水嘅傳聞，其實都傳咗好一段時間，據講有人想好價啲先至做，做法亦唔一定係批股，或者發行債券都唔定。富豪上周五收0.47元，冇起跌。
另外，前稱慶豐集團的中國資源開發（661），原本炒得好地地，但上周五無端端急跌15.58％，收0.65元。經紀陳話，聽講有個別大陸炒家欠水，以往已有前科，今次可能又係同一原因令股價下跌。
慕容小初