當車神舒密加啱啱當選德國世紀最佳運動員之際,佢細佬拉夫都唔執輸,即刻喺另一個範疇「攞威」;拉夫被證實入股德國一間從事色情事業嘅大機構,一於向賽車以外嘅事業賺取外快。據聞呢間色情機構喺十個歐洲國家擁有逾二百間售賣色情產品嘅商店,明年大計係要喺東歐嘅斯洛文尼亞投資逾千萬港元,開設八間性商店。
雖然有報章揶揄拉夫點解會「淪落」到要賺呢類「偏門錢」,但呢位德國一級方程式車手好理直氣壯咁話:「我加入嘅係一間壯志雄心嘅公司,對我嚟講,喺這方面嘅投資同其他方面沒有不同。而且我主要出錢投資,唔會實質參與業務。」
據稱呢間色情公司喺過往兩年賺成過億港元,拉夫既然喺車場贏唔過大佬舒密加,咁喺另一方面「發圍」都好正常;畢竟當今都冇一位F1車手涉足色情事業啫!
我求大俠上次批評完「大婆台」對荷甲聯球隊譯名後,引嚟頗大迴響;今次就想讚吓佢哋從善如流,各隊譯名已經「親民」咗,好似恩斯赫德已經叫番做川迪。更值得一提嘅係,上周六直播秉承過去幾場直播盤路,燕豪芬只能小勝贏半個盤兼入球「細」,唔少心水清球迷都話幫到手。
前日樸茨茅夫作客保頓,好多人睇死哈利列納一走,佢哋實唔掂,點知佢哋竟然作客贏一比○,係七個月嚟第一次聯賽作客贏波,總監兼暫代領隊沙積都算好腳頭。講番保頓真搞嘢,之前對聯賽四大名牌全部搶到分,但對住同級或次一級球隊就失手,果然有「劫富濟貧」風格。
列當度退休囉,呢位一代名將對上一次比賽就係今夏隨AC米蘭東來,本港球迷總算見證到佢最後餘暉。列當度承認退休後想從事同足球有關嘅工作,另外又話曾經有幾隊西班牙球隊搵佢加盟,但佢唔想着皇馬以外嘅波衫比賽。咁識講嘢,話唔定皇馬將來會畀一官半職佢喎。
前晚羅馬大勝錫耶納四比○,賽後最多人談論嘅人並唔係省入兩粒嘅蒙迪拿、托迪,而係呢場波包辦四次助攻嘅卡斯辛奴。印象中好少有人一場波助攻四次,而呢位哥仔早排同教練迪尼利唔妥,獲解凍無耐就即刻有表現。羅馬躉望就望佢生性,等呢齣浪子回頭可繼續播落去。
逢周一至周五見報