中大歷任校長聚首一堂 - 李八方

  中大歷任校長聚首一堂 - 李八方

中大歷任校長噚日聚首一堂,包括現任嘅劉遵義、上任嘅金耀基、已跳槽政府做教統局局長嘅李國章及前任校長高錕及馬臨,齊齊為已故中大創校校長李卓敏嘅銅像致贈儀式揭幕。李國章致辭時話,見到呢個銅像,就會泛起對前校長李卓敏嘅懷念;正在全力推介三三四學制嘅李國章重不忘加多句,強調若李卓敏校長仍然在生,相信佢一定會支持三三四學制同課程改革。
八方估李卓敏校長泉下有知,都會希望中大盡快回復佢在任時嘅四年制,唔知李國章幾時做得到呢?講返呢個銅像,係中文大學中國文化研究所前所長陳方正博士所贈,豎立喺研究所嘅庭園之內,因為李卓敏校長亦曾兼任中國文化研究所所長達七年之久,陳方正博士重請咗南京大學雕塑家吳為山教授親自操刀製作個銅像,紀念數十年前已經致力發揚中國文化傳統嘅李校長。
(圖)多位中大前任校長:金耀基(左二)、馬臨(左三)、李國章(左五)、高錕(右四)連同現任校長劉遵義(右五),一齊為創校校長李卓敏銅像揭幕。


傳真︰2623-9278
電郵︰pf_lee@appledaily.com