Beyond敢怒敢言的作風由出道至今二十年從未改變，對於李克勤、許志安、古巨基及梁漢文近日被譚詠麟封為「新四大天王」，Beyond三子日前接受本報訪問時，直指他們未夠班，黃貫中認為天王虛名如蟹黃。
本港搖滾班霸Beyond日前接受本報訪問，成員黃家強、黃貫中（Paul）和葉世榮提到明年一月舉行最後一次Beyond演唱會時，透露優先訂票已經爆滿，主辦單位東亞娛樂方面表示內部訂購也反應熱烈，Beyond相當開心，家強更笑說：「如果公開售票一日賣晒，咁要叫譚詠麟封我哋做『新四大飛王』，佢之前封咗人做新四大天王嘛。」
在旁的阿Paul即時追問家強：「乜嘢新四大天王呀？你講陳奕迅呀？」當他得悉新四大天王是李克勤、許志安、古巨基及梁漢文時，阿Paul愕然道：「真㗎？夠班未呀？呢個名幫唔到佢哋，簡直係害緊佢哋喎，蟹黃咋啩？聽講𠵱家啲蟹係食垃圾大，重狂打激素，谷到大大隻先攞去賣，食咗冇益，啲歌手咁樣封王，同大閘蟹有乜嘢分別呀？」
阿Paul又直言覺得新一代一線歌手只得李克勤及陳奕迅最有實力，他又慨歎香港樂壇能否過渡網上盜錄及翻版衝擊還未知，歌手應團結創作好的作品，不應只顧爭奪虛名。三子又同聲表示欣賞譚詠麟提攜後輩之心，但新四大天王人選還未夠資格，天王虛名只會加重歌手壓力。
提到年底的樂壇頒獎禮將陸續舉行，不少歌手為爭獎項各出花招，家強說：「啲人講到自己好似贏硬咁，真係好唔化，係咪有封號嘅人就永遠高高在上？冇嗰啲就永不超生？咁所有後輩唔使努力啦，冇人封你，你唔使做啦。樂壇應該公平競爭，有個名係咪代表實至名歸先？做咗乜王但連歌都唱得唔好都冇用，問下自己企唔企得穩先啦，以為好叻，同古代昏君有乜分別？我夠可以叫自己做霸王啦。我最服嘅只係劉德華，一直都打不死。」
此外，李克勤前晚在灣仔會展環球十周年演唱會上，和司儀林曉峰（阿Lo）表演唱雙簧，克勤說：「環球似大家庭，動物園，刀郎係狼，校長（譚詠麟）都係狼。」
阿Lo其後又說：「咁Eason（陳奕迅）一定係豬，新嚟新豬肉。」克勤說：「佢係了哥，一了了過嚟就做阿哥，兼且又唱得。」阿Lo說：「咁另一個阿哥呢？係咪一山不能藏二虎嘅安哥（許志安）？」克勤即答：「安仔係儍豹，因為佢鍾意着粉紅色出席頒獎禮。」
採訪：蔡如玉、駱華齡 攝影：仇志德、林德雄
