買樓唔煩，收樓先至煩，因為要執漏嘅地方唔少，但唔係個個買家都係驗樓專家，所以都有排搞。
其實，驗樓要眼耳口鼻都用埋至得，所以美記培訓中心舉辦「精明業主全面睇」課程，由測量部行政總裁張一輝主講，教前線員工點樣驗樓。步驟係由外而內，由有水睇到冇水。
睇樓先要睇「死位」，即要搭棚至可以睇到嘅位置，例如外牆窗邊係咪有缺裂、外牆係咪有裂痕或油漆與批盪有冇剝落。
至於屋內，次序係廚房、浴室、睡房到客廳。用眼去睇牆身角落有冇水迹，窗口牆身油漆係咪新油上去。用耳聽吓，敲打牆身與地板時，有冇空殼聲；水喉出水位係咪暢順。喺浴室、洗手盆與坐廁沖水時，用鼻聞吓有冇異味；室內喺咪有異，一樣要留意。業主要多口問吓管理員，大廈幾時做過翻新工程，業主畀晒有關費用未。其他要留意事項，車位係咪喺消防花灑喉下面，以及有冇滴水。
大嶼山愉景灣住客及商戶，除咗搭住客專車外，只可以用高爾夫球車代步，不過，中原地產最近竟然大模大樣咁揸架私家車，接載買家周圍去睇樓。
中記李偉寧話，發展商香港興業，見外區客入嚟睇樓，比例不斷上升，好似中記就佔一半，所以肯批個私家車牌畀中記。佢補充，都申請咗好耐至得。但因政府規定，唔畀私家車出入愉景灣隧道，惟有搵架拖車拖過隧道。
李偉寧指出，公司原本有六架高爾夫球車，接載買家睇樓，但係一架車只得四個位，主區同外區代理已佔咗兩個，若買家一家大細嚟睇樓就好煩，𠵱家用ToyotaPrevia八人車，就解決晒。呢架私家車，價值三十萬，但係原來平過高爾夫球車好多，因為一架高爾夫球車，最平都要五十萬。
聽講，美記都獲批一個私家車牌，但其他行業租戶，要攞個車牌就肯定好難囉。
南豐發展投到大角嘴櫻桃街市區重建項目，有意收購埋地盤中間嘅「頂心杉」海明閣單幢樓，咁樣剪裁會好好多。點知，收購拖到𠵱家都未掂。
聽講，一旦雙方拉倒，南豐計劃將重建項目位置最差嘅方位，即後樓梯位對住海名閣，重會將海名閣前面嘅海景全部遮晒。如果係咁，海名閣住客，日後冇景睇之餘，物業價值都會受損。
𠵱家單嘢重未完，唔知最後點收科，係大家各讓一步，和氣收場；定係講唔掂數，兩敗俱傷。
舊區換樓潛力大，連大代理行都入去插旗，不過，蘭西聽小道消息講，其實啲大行「項莊舞劍」，唔係想同地膽代理爭市場佔有率，目的只係收集客源，然後將啲客射去買外區單位或者新盤，因為銀碼較大，佣金和味好多。
有啲行重私下規定，只做某個銀碼以上嘅盤，低嘅就唔做。
有時喺分行門口見到嘅單張，外區單位重多過本區。因為咁，新分行就要守好耐至得，但啲代理就唔等得，好多都蟬過別枝，搞到老頂非常頭痛。
地產代理行業急速擴張，吸引唔少新人入行，前線代理固然要培訓，管理層都要搵接班人。
港置為咗培養新一代接班人，配合公司發展，甄選咗三十幾個精英，參加培訓課程，等佢哋成為公司嘅「尖子」。港置執行董事李志成，親自公開自己成功秘訣，就係要抱「開放式思考」，唔好畀固有思想規限，捉緊每一個機會。
佢指出，同事想成為一個優秀主管，要留意眼神運用、個人形象、說話技巧與正面心態等修養。
西九龍文娛藝術區項目引起嘅爭議，一直備受市場關注，唔同意見嘅聲音陸續有嚟。標書規定，中標財團一定要起嘅文娛設施，有由三間劇院組成嘅劇院綜合大樓、一個提供最少一萬個座位嘅演藝場館。其他設施有由四個不同主題博物館組成嘅博物館群、演藝中心、海天劇場，以及至少四個廣場。
業內人士話，個可容納萬人嘅演藝場館，究竟係咪可以日日有咁多人入座；有乜嘢節目，吸引到咁多人嚟睇，政府唔知有冇認真諗過，擔心個場館因租唔出而丟空，或者用嚟做展銷場就認真弊嘞。
電郵地址：
