上星期三大清早，睇有線電視新聞，知道黃霑去世；之前一晚，知道著名娛樂版記者?編輯林冰去世，黃霑與林冰，就係二十幾年前娛樂新聞嘅支柱，兩人一齊歸天，以後都好難搵番咁嘅人物。
去到中環，見到中環街市旁，報販雲集，以前呢度一定有兩架德強記報紙車嘅，呢朝唔見影嘅？八卦問吓，街頭老友話：「要等第二輪報紙呀！」聽完，唔多明白。返到辦公室，即刻睇吓暢銷大報，乜唔見有黃霑逝世嘅新聞嘅？反而《文匯報》爆冷門，新聞最詳細，重講到早上二時三十分嘅仁安醫院記者招待會，宣布黃霑死訊㖭，其他報紙就有兩三段。唔係呀？兩張暢銷大報竟然走漏新聞？唔通兩張大報印頭輪紙印得太早，未天光就出街，所以唔知黃霑過咗身？
等到九點幾，落街再買過暢銷大報，呢勻有嘞，黃霑霸佔頭版，好搶眼。報販話：「呢批係第二版，出得比較遲，我都搶得好急呀。」遲到好過冇到，呢兩份報紙印得多，賣得多，報販靠佢哋食胡，你話呢兩張報紙冇黃霑嘅新聞喎，報販實呱呱嘈。S報小記對左丁山講：「我哋報紙日日派記者喺旺角，睇實暢銷大報嘅頭輪版，睇吓佢哋有乜頭條、獨家，而係我哋冇嘅。於是可以立即跟進，寫番幾句趕截稿。估唔到星期三凌晨三點佢哋頭輪紙冇嘅黃霑新聞，我哋有。」
黃霑死後，恐怕後繼無人，一來當今中文水平低落，二來歌壇不景，填詞唔值錢，否則潘源良都唔會轉型去做講波。既然搵唔到錢，點會有叻人肯入行吖。六十四歲，實在年輕，天不假年，令人欷歔，不過黃霑喺六十四年內嘅經歷、成就，其他人喺一百九十二年內都未必得到，佢可謂一生無憾。