泛民主派上周開會傾吓一周大勢，所謂一波未平、一波又起。長毛上次同特首保鑣嘅衝突重未解決，大嚿、長毛同大班三大惡人又同政府保安開片。大嚿上星期三晚一返到立法會，即時向秘書長馮載祥投訴，話當佢去完領匯記者會踩場後，就俾政府保安阻止佢三人返立法會開會；同時差唔多想非法禁錮佢哋喺政府總部。
咁大件事，馮載祥梗係唔敢怠慢，即時寫咗封信畀行政署署長張琼瑤女士，請佢調查及回覆！
八方睇怕啲保安人員一定唔知立法會議員係民意代表，佢哋其中一個責任就係去議事堂開會，邊個都唔阻得，否則監都有得坐。基本法第七十八條就清楚列明，班尊貴議員喺出席會議同去開會途中不受逮捕，就可知佢哋地位幾崇高。下次見到立會議員，都係小心啲好，唔好阻住佢哋去路，知冇。
傳真︰2623-9278
電郵︰