大嶼山發生山火，燒足三日，一度迫埋愉景灣民居，可憐無數自然生態生靈：蝴蝶、青竹蛇、黃麖、螳螂等，可能經已葬身火海！
不過，對於呢個政府嚟講，大嶼山山火，係一個大好消息！正所謂火燒旺地，大嶼山俾啲火燒一燒，成片山頭黑禿禿，重好！可以慳番啲砍伐樹木嘅人工成本，一把火燒晒啲樹，從此可以大興土木，起居屋、商場、美式主題公園，特區經濟有運行嘞從此！
喺南京中山陵，周圍有二萬棵樹，當地土共政府，為發展建設，準備起樓，派人將二萬棵樹斬光！使乜咁笨吖，不如派人嚟特區取吓經，走去大嶼山觀吓火，將佢一把火燒光，咪慳番請嗰幾千個河南伐木民工囉係嗎？
大嶼山大火，百年難得一遇，下一任特首，洩漏天機。因為大嶼山係財政司司長唐唐重點開發地區，計劃搞美式主題公園，開發陰澳物流園，自由黨田少，重獻計話要搞賭場㖭。喺下屆特首權力角逐嘅圈地運動之中，大嶼山係唐唐指定嘅地頭兼考試籌碼，準備將佢開發到美輪美奐，向胡溫交貨。得大嶼山者得天下，今次唐唐嘅封邑發生森林大火，愈燒唐唐愈當旺，下屆特首，重唔係張國榮生前嗰位同名嘅男性密友？
火燒大嶼山，不過由曾司長打理嘅西九龍，反而靜英英，一片空地，就算淋火水放火都燒唔起！我哋曾司長亦係下屆特首大熱門，咁死嘞，燒大嶼山，唔見燒西九龍，曾司長咪冇機？
粗通玄學嘅八方再睇真啲：唔怕！因為大嶼山山火，有各報圖片為證，沿住個山脊，燒成一線，好似一條赤色火龍！呢，特區嗰個飛龍區徽，亦係紅卜卜，十足一條火龍咁（雖然有啲逢特必反分子，污衊話似一隻紅色嘅燒雞頭，即是暗指禽流感會亡港），呢條火龍，聽講係曾司長手下設計，當日亦由曾司長親自喺尖沙嘴，㩒着支激光燈，主持雷射點睛儀式，一支銀光，跨海射過港島嗰邊，不知幾咁架勢！可見呢條火龍，其實係曾司長嘅Baby，故此，火龍騰蓋大嶼山，即是話曾爵士做特首嘅機會，係壓住唐唐喎！
大嶼山火龍曼舞，即是煲呔技壓唐唐，咁盛傳另一隻黑馬太子章，搞緊教改嗰壇，亦燒起咗個火頭，辣到張盲光同成班教師屁股都燶喎！若然講到火燒旺地，都要等一兩間大學同十幾間中學齊齊火燭，咁太子章至先會有後勁。全港幾千間學校嘅校工好執生嘞，若然你哋唔順煲呔，又唔信自稱俾窮人發洩嘅唐唐，想幫太子章造吓勢，喺校園見到學生留低啲未熄嘅煙頭，千祈要詐睇唔到，提早收工喎！
傳真︰2623-9278
電郵︰